Villanueva, Ducanes sa korona ng Barcelona Brandy 9-ball challenge

Pinutakti ng upset ang pagsisimula ng qualifying round nang umusad sa finals sina Eduardo ‘Picoy’ Villanueva at Boy Ducanes sa 1st Barcelona Brandy P1M 9-Ball Billiards Challenge kahapon sa Omerta Bugsy II Bar and Billiards sa West Triangle sa Quezon City.

Ginulantang ni Villanueva, dating national team cue artist ang beteranong si Ramil Gallego, 6-5 habang naging masuwerte naman si Ducanes sa endgame breaks upang igupo si Emil dela Paz, 6-5.

Maghaharap ang dalawa sa race-to-13 finals sa Robinson’s Galleria para sa P15,000 weekly top purse at tsansang makaharap ang Barcelona Brandy champion Lee Van Corteza para sa titulo.

Ipapalabas ang finals sa NBN Channel 4 mula alas-3-5 ng hapon.

Nagtala rin ng upset sina Anton Nicolas na sumilat sa 1998 Asian Games 9-Ball doubles gold medalists na si Snooky Villanueva ngunit tinalo naman ni Ducanes sa round-of-8, 6-5.