Martes may pag-asa na makakuha ng ginto sa Asian Games

Ipinagpatuloy ni Cristabel Martes ang pagbibigay ng mataas na morale sa pag-asa ng bansa na makuha ang ginto sa Asian Games ngayong darating na Setyembre matapos na magpamalas ng impresibong performance ng tumapos ito ng ikaapat na puwesto sa overall sa katatapos lamang na 8th Asian Marathon Championships sa Hongkong.

Ang 23-anyos na si Martes, tubong La Trinidad, Benguet ay nakipagsabayan ng lakas sa 42-kilometrong distansiya mula sa mga mahuhusay na runners sa Asia at nagtala ito ng tiyempong dalawang oras, 45-minuto at 48 segundo na mas maganda kumpara sa kanyang personal best na 2:48:48 at sa Southeast Asian Games mark na 2:52:43.

Tinalo ni Martes, tumapos sa likod ng mga tigasing runners na sina Zhang Shu Jing ng China (2:36:27) at Kiuchi Mio (2:38:35) at Yoshimura Hideko ng Japan (2:42:21) ang mga mahuhusay ring runners mula sa Kazakhstan, Uzbekistan, Turmenistan, India, Sri Lanka at Nepal.

Nakuntento lamang ang 32 gulang na si Roy Vence sa 13th puwesto sa overall matapos na dumanas ng pagkahilo at pagsusuka sa kalagitnaan ng karera makaraang kumuha ng ilang pagkain na iniaalok sa mga kalahok sa gitna ng kalsada.