PBL 2001 Challenge Cup: Kumukutitap na panalo

Naisulong ng Kutitap Toothpaste ang buwena-manong panalo matapos maitakas ang 76-74 panalo kontra sa Montana Pawnshop sa pagpapatuloy ng PBL 2001 Challenge Cup sa Makati Coliseum.

Nakabawi ang Cavity Fighters sa kanilang 72-62 pagkatalo kontra sa Blu Detergent noong Sabado sa tulong na rin ng krusiyal na pagkakamali ni Jenkins Mesina matapos maghabol ang Montana.

Makaraang itabla ni Aries Dimaunahan ang score sa 74-all patungo sa huling 6.5 oras ng labanan, na-foul ni Mesina si Mark Saquilayan na nagdala sa huli sa charity lane.

Kampanteng isinalpak ni Saquilayan ang kanyang dalawang bonus shot upang iposte ang final score may apat na segundo na lamang ang natitira para sa huling tsansa ng Montana na agawin ang panalo.

Ngunit dahil mayroon pang foul ang Kutitap bago mag-penalty, napanipis pa ng Cavity Fighters ang huling posesyon ng Jewelers sa 2.9 kaya’t hindi na nakapagtata-kang magmintis ang minada-ling tres ni Dimaunahan na sana ay nagligtas sa Montana.

Pinangunahan ni Alex Salangsang ang Kutitap sa kanyang tinapos na 16 puntos habang sumuporta naman si Bajar at Rainier Sison na may 12 at 10 puntos, ayon sa pagkakasunod.

Mula sa 7-puntos na kalamangan ng Kutitap, 72-65, nakalapit sa 71-72 ang Montana nang umiskor ng magkasunod na basket sina Mesina at Gary David upang kumpletuhin ang kanilang magkasunod na steal.

Nakalayo ang Kutitap sa 74-71 mula sa free throws ni Rensy Bajar, ngunit nakatanggap ng mahigpit na hamon ang Cavity Fighters nang pumukol ng panablang tres si Dimaunahan.

Maagang ipinadama ng Kutitap ang kanilang misyon na makabangon mula sa unang kabiguan nang agad na itiklop ang 24-21 kalamangan sa unang canto.

Mula dito, hindi na nagpabaya ang Cavity Fighters at kanilang hinawakan ang trangko kung saan kanilang pinalaki ang naitayong pundasyon sa walong puntos, 45-37 sa pagsasara ng halftime.