Gayoso, matibay na ebidensiya ng PBA

Susuriin ng PBA fact-finding board ang paglabag sa salary cap rule ng Tanduay Gold Rhum batay sa isinumite ng isang witness.

Naniniwala ang PBA na may matibay na ebidensiya si Jayvee Gayoso na pinanghahawakan laban sa Basic Holdings Inc., ang prangkisa ng Tanduay Gold Rhum kung pagbabatayan ang mga bank account na ibinigay nito kay PBA finance officer Ricky Palou.

Si Palou ang isa sa three-man probe team na binuo ni PBA Commissioner Jun Bernardino.

Sinabi ni Palou na isinumite ni Gayoso ang isang bank account na nagpapalakas ng kanyang ebidensiya na ang Tanduay ay mayroong ‘under the table’ contract maliban sa kanyang uniform player contract na nilagdaan sa Tanduay.

Si Gayoso mayroong tatlong taong kontrata sa Tan frachise na magtatapos ngayon, subalit siya ay napilitang magretiro nang ang kanyang kontrata ay bilhin na lamang ng Rhummasters.

Sinabi pa ni Gayoso na siya ay tumatanggap ng karagdagang kita na P50,000 bawat buwan ng kanyang paglalaro sa Tanduay.

Gayunman, ang mga dokumento at pahayag ni Gayoso ay pag-aaralan pang mabuti ng PBA bago nila ito isumite sa PBA board of governors.

Kung sakali man na mapatunayang lumabag ang Tanduay sa salary cap, sila ay posibleng patawan ng sanction ng board na mapapadali sa kanilang tuluyang paglisan sa PBA.

Samantala, posible rin na imbestigahan ng PBA ang napabalitang may anomalya sa kontrata ni Pido Jarencio.