Talao, bagong PBAPC prexy

Nahalal si Tito Talao na pangulo ng Philippine Basketball Association (PBA) Press Corps nang walang lumaban dito sa isinagawang botohan noong Biyernes sa PhilSports Arena.

Hahalinhan ni Talao, beteranong sports journalist, si Rey Lachica ng Malaya na nagserbisyo ng dalawang terms bilang pangulo. Siya ang ikawalong pangulo ng press corps na binubuo ng mga sportswriters na regular na nagko-cover ng pinakamatandang professional na liga sa bansa.

At sa ikatlong pagkakataon, nanalo naman si Francis Ochoa ng Today bilang vice-president for external, habang si Mark Reyes ng Philippine Daily Inquirer ang iniluklok para sa internal vice-president.

Ang iba pang opisyales na kinabibilangan nina Lito Oredo ng Tumbok, secretary, Joel Orellana ng Kabayan, treasurer at Mae Ochoa ng Pilipino Star Ngayon, auditor.

Ang Directors ay sina Dave Coros, Bulletin; Nelson Beltran ng Philippine Star; Dodo Catacutan Bulletin; Lachica, Malaya; Barry Pascua, Bandera; Ramon Lorenzo, Sports-weekly; Ramil Cruz , Abante; Girlie Turno, Bulgar at Russel Cadayona, Balita.

Idaraos ang panunumpa sa tungkulin ng mga bagong opisyales ng PBAPC sa susunod na buwan ni PBA Commissioner Emilio "Jun" Bernardino bilang inducting officer.