Sri Lanka bokya sa RP

Blinangka ng Philippines ang Sri Lanka, 3-0 kahapon upang kumpletuhin ang kanilang three-tie sweep sa top Group A ng Davis Cup Asian Oceania Zone Group III tournament sa Rizal Memorial Tennis Center.

Sa kabila na nakakuha na sila ng ticket patungong semifinals noon pang Huwebes, hindi pa rin nagpabaya ang host at kanilang ibinigay ang lahat upang maningning na itiklop ang single-round eliminations na malinis ang kanilang kampanya.

Gaya ng dati, pinangunahan ni Johnny Arcilla ang pambobokya sa kalaban nang kanyang igupo si Renouk Wijimanne, 4-2, 4-2, 5-4 (7-2) sa unang singles match sa loob lamang ng isang oras at 25 minutos.

Ngunit mas higit na pumukaw ng pansin ang beteranong si Adelo Abadia nang kanyang patalsikin si Dinuka Ranaweera, 4-0, 4-0, 4-1 sa loob lamang ng 47 minuto.

Kinailangan naman ng tambalang Rolando Ruel Jr., at Joseph Victorino na buma-ngon mula sa unang set na pagkakalubog bago nila nadaig ang tandem nina Ranaweera at Subramaniam, 2-4, 4-1, 4-0, 5-3 upang kumpletuhin ang pananalasa ng koponan.

Bunga nito, mapapasabak ang RP team kontra Tajikistan sa semifinals ngayon.

" Tomorrow will be a big day for us. We will have to work doubly harder," pahayag ni RP non-playing team captain Joseph Lizardo hinggil sa pakikipaglaban sa Tajikistan.

Kinuha ng Tajikistan ang runner-up sa Group B matapos na ma-sweep ang Ka-zakhstan, 3-0 at isara ang kanilang elimination series sa 2-1 record.

Habang sinusulat ang artikulong ito, kasalukuyan pang naglalaban ang Saudi Arabia at Qatar sa Group B kung saan pinaghatian nila ang kanilang naunang dalawang laro.