San Juan Knights, titiwalag sa MBA ?

Nananatiling malaking katanungan kung mayroon pang national champion ang Metropolitan Basketball Association.

Matapos ang mga huling kaganapan nitong mga nakaraang araw kung saan nagpalit ang pamunuan ng pamahalaan, may pangambang tumiwalag ang Knights na pagmamay-ari ni Sandy Javier at minamanage ni Jinggoy Estrada, ang anak ng dating pangulong si Joseph Estrada.

"I’m not sure if there will be a San Juan Knights anymore." wika ni Alan Borromeo, ang assistant coach ng San Juan.

Gayunpaman, sinabi ni Borromeo na wala pa itong natatanggap na pormal na notice ukol sa kalagayan ng kanilang koponan.

Si Javier na chairman ng Metropolitan Association of Race Horse Owners ay nangasiwa ng Knights dahil malapit ito kay Mayor Estrada.

Samantala sa kasalukuyang try-outs para sa Philippine men’s team, kinumpirma ni Knights guard Chris Calaguio at Chito Victolero na tatlo lamang sa kanilang team na sina Calaguio, Bonel Balingit at Omanzie Rodriguez ang may live contract.