Lao dapa kay Macapendeg

Naungusan ni Hamza Macapendeg ng Cotabato City si Maurice Lao, 6-3, 6-4 sa boys’ 14-under division upang pamunuan ang pananalasa ng mga provincial entries kahapon sa year-ender ng Milo Junior Tennis Cup and Regional Workshop sa Rizal Memorial Tennis Center.

Nakasama ni Macapendeg sa tagumpay ang boys’ 16-under campaigner na sina PJ Tierro ng Olongapo City na nagtala ng 6-1, 6-0 panalo kontra Zedrick Battad; Edilyn Balanga ng Dagupan na nambokya kay Denise Culaba, 6-0, 6-0 sa girls’ 16-under bracket’, Catherine Flores ng Ligao Albay na nagposte ng 6-3, 6-2 panalo kontra Kristel Samala at Bernard Alpuerto ng Los Baños na nanalo na-man kontra Allan Galang, 6-0, 6-1 sa junior men’s 21-under plum.

Umusad din sina Balanga at Flores kasama sina Yvy De Castro na nanaig kontra Patricia Oreta, 6-0, 6-0; Krissy Alina na gumapi naman kay Katrina Pamintuan, 6-6 , 4-0 ret at Tracy Bautista na tumalo naman kay Karen Reyes, 6-2, 6-0 sa susunod na round.

Nagsipagwagi rin sina Rollyto Litang, JR Arias, Ghande Matunog, Allan Agulto, Ian de Guzman, Emerson Ocampo, Borgs Salpico, Raffy Santiago at Jigger Tanco sa Milo netfest na ito na inorganisa ng Children’s Tennis Workshop at suportado ng Adidas at Sports Kids.