Batang Red Bull 3rd placer sa PBA Governors' Cup

Gumawa ng magandang pagtatapos ang expansion team na Batang Red Bull sa kanilang unang taon sa liga nang kanilang angkinin ang konsolasyong ikatlong posisyon sa season-ending PBA Governors’ Cup.

Matapos mabigong makarating sa finals, pinagbuntunan ng galit ng Red Bull Thunder ang Mobiline Phone Pals sa kanilang knockout game kagabi nang kanilang iposte ang 98-89 panalo sa Araneta Coliseum.

"This third place means a lot to us," pahayag ni coach Yeng Guiao na masayang-masaya sa narating ng kanyang koponan sa kanilang debut year.

Ayon kay Guiao, nakikinikinita nito ang magandang hinaharap ng koponan dahil bukod sa kanilang naging karanasan sa season na ito ay maaasahan na rin ng Red Bull ang serbisyo ng kanilang number one player na si Kerby Raymundo na maaari nang maglaro sa susunod na taon, makaraang masus-pinde ito ng isang taon.

Para kay Guiao, ang unang taon ng Thunder ay isang ‘learning process’ lamang kaya naman para sa naturang coach ang kanilang panalo ay isang malaking achievement.

Eskplosibong binuksan ng Red Bull ang labanan nang kanilang kunin ang 28-10 kalamangan sa pagsasara ng unang canto sa pangunguna nina import Ray Tutt, Mike Pennisi at Ato Agustin.

Naitala ng Thunder ang pinakamalaking kalamangan na 20 puntos, 60-40 sa third quarter ngunit sinikap itong tibagin ng Mobiline na nakalapit sa 73-75 sa ikaapat na quarter. (Ulat ni Carmela Ochoa)