Crystal Spring bagsak sa Gringo-Barkadahan sa PYBL

Nagpamalas ang Gringo-Barkadahan ng intensibong depensa sa huling maiinit na bahagi ng labanan upang igupo ang Las Piñas College-Crystal Spring kahapon sa 1st Philippine Youth Basketball League sa Makati Coliseum.

Pinangunahan nina Carlo Altamirano at Oscar Monte-mayor ang Barkadahan sa kanilang unang panalo sa paghakot ng tig-16 puntos na inspirado sa ipinakitang suporta ni Sen. Gringo Honasan na dahilan upang mapuwersa ang kanilang kalaban na gumawa ng turnovers sa final quarter upang maningning na simulan ang kanilang kampanya.

Nagsalpak si Montemayor ng anim na sunod na basket sa 15-9 run katulong si Niño Songco upang hatakin ang 66-59 kalamangan, patungong 2:14 ng oras.

Nagawang ibaba ni John Paul Alcaraz ang abante ng Barkadahan sa 66-69 nang umiskor ito ng tres may 45.6 segundo na lamang ang nalalabi.