Pinay powerlifter naka-bronze medal sa Sydney Paralympics

SYDNEY--Makaraan ang nakakadismayang kampanya sa Millennium Olympic Games, bumawi naman ang Philippine sports sa tikas ng performance ng powerlifter na si Adeline Dumapong na nag-uwi ng medalya sa 11th Paralympiad Games na ginanap sa Olympic Park’s Downes Pavillion dito.

Ibinulsa ni Dumapong, tubong Ifugao Province ang medalyang tanso sa powerlifting women’s 82.5 kg. categroy.

Naging maganda ang kanyang buhat sa 97.5 kg. sa kanyang unang tangka. Pero bumagsak sa ikalawa sa 107.5 kg. na hindi naman nakaapekto sa kanyang 110 kg. na binuhat sa third at final na pagtatangka na naghatid sa kanya para sa ikatlong puwesto sa anim na lahok.

Ipinagmamalaki ni Philippine Sports Commission Chairman Carlos Tuason ang tagumpay ng Pinay powerlifter sa international competition.