Bakanteng WBC Int'l flyweight title paglalabanan sa Elorde gym

Isa na namang umaatikabong bakbakan ang matutunghayan sa Ringside @ Elorde ngayong alas-12 hanggang ala-1 ng hapon sa IBC 13.

Ipalalabas ang sagupaan sa pagitan nina Randy Mangubat at ng Koreanong si Jong Wan Kim na maghaharap para sa bakanteng WBC international flyweight title.

Ang laban na ito ay isang 10-rounder na susuportahan ng championship fight sa pagitan naman nina Allan Morre at Tony Bernales. Si Morre ay tubong General Santos City samantalang si Bernales ay taga-Bohol.

Ang Ringside @ Elorde ay hatid ng Elorde International Productions sa pamumuno ng batikang promoter na si Gabriel "Bebot" Elorde Jr., sa tulong ng Casino Filipino, CCME Homemade Foodstuff, Aling Agnes Native Lechon at Elorde Sports Complex.