FiberXers hinablot ang No. 3 spot sa quarters
MANILA, Philippines — Ang Converge ang kumuha sa No. 3 spot at inilaglag ang Magnolia sa No. 4 sa crossover quarterfinals ng Season 49 PBA Governors’ Cup.
Sinunog ng FiberXers ang Hotshots, 89-82, sa pagtatapos ng group stage kahapon sa Ninoy Aquino Stadium sa Malate, Manila.
Kumamada si import Jalen Jones ng 27 points at humakot si center Justin Arana ng 12 markers at 12 rebounds.
Isinara ng Converge ang double-round eliminations sa 6-4 record at bagsak ang Magnolia sa 5-5.
Bilang No. 3 sa Group A ay lalabanan ng FiberXers ang Group B No. 2 San Miguel Beermen (6-4) at sasagupain ng Group A No. 4 Hotshots ang Group B No. 1 Rain or Shine Elasto Painters (7-2) sa crossover quarterfinals.
Sa iba pang matchup, magtutuos ang Group B No. 3 Barangay Ginebra (6-4) at Group A No. 2 Meralco (7-3).
Lalabanan ng Group A No. 1 TNT Tropang Giga (8-2) ang Group B No. 4 NLEX (5-5).
Matapos ang quarterfinals ay sasalang ang apat na semifinalists sa best-of-seven series patungo sa PBA Finals.
- Latest