Magtiayon “nahulga” sa mga langyaw   

CEBU, Philippines — Magtiayon nga nagpuyo sa Highland Subdivision sa lungsod sa Minglanilla, diin nakita ang kapin sa 60 ka mga langyaw nga nagsul-ob og itom nga sapot samtang nagmartsa sa usa ka parte sa subdivision ang niduol sa buhatan sa Minglanilla Mayor ug sa Police Station, Martes sa buntag, marso 11, 2025.

Ang magtiayon matud pa nipadangat sa ilang kabalaka ug kahadlok sa presensya sa maong mga langyaw. Matud pa nila, kusog makabadhas sa ilang mga sakyanan ug midugang pa nga adunay dalang hinagiban ang uban niini.

Ang magtiayon una niabot sa buhatan ni Mayor Rajiv Enad ug nisumbong didto ug gitambagan sa Chief of Staff sa mayor nga adto modangop sa Minglanilla Police Station.

Nipasangil sab sila nga adunay higayon nga giadto sila sa ilang balay human nakaaway ang anak niini sa usa sa mga anak sa langyaw.

Gihulagway nila nga ‘intimidating’  ang linihukan sa ubang mga langyaw maong nabalaka gyud sila.

Sa pikas bahin, ang Bureau of Immigration nihimo na og imbestigasyon sa grupo nga Abayonaym o 'Those In Need of the Father.'

Si Enad sa iyang Facebook post miingon nga managlahi ang mga pamahayag sa mga langyaw mao nga nakapaalarma sa mga residente sa maong subdivision.

Sa pikas bahin, si Atty. Brandon Enad, BI Terminal Head sa Mactan Cebu International Airport miingon nga maabi-abihon ang mga Sugbuanon apan kinahanglang morespeto sa mga balaod ang mga langyaw. (BANAT NEWS)