Face-to-face classes sa Buhisan Elem School posibleng ipakanselar
CEBU, Philippines — Posibleng ipakanselar ni Cebu City Mayor Raymond Alvin Garcia ang face-to-face classes sa Buhisan Elementary School human sa migawas nga inspeksyon sa Office of the Building Official (OBO).
Nakita nga dunay mga nangliki sa salog, ilawom sa mga sagbayan, sa hagdanan, sa pultahan ug sa mga bintana ilabi na sa buhatan sa principal.
Nirekomendar ang OBO alang sa dinalian nga pagpaayo sa tulo ka andana nga edipisyo tungod kay dunay dagkong liki nga nakita human lakip kini sa natay-og sa 5.8 mangnitude nga linog niadtong Enero 23, 2025.
Matud pa ni Garcia kung makanselar man ang mga klase kinahanglan nga ipaubos og blended learning o pinaagi sa online classes ang kapin 700 nga mga tinun-an sa maong tunghaan.
Makigtagbo sab si Mayor Garcia ngadto kang Dr. Nimfa Bongo kinsa mao ang DepEd Superintendent sa syudad lakip na sa Cebu City Disaster Risk Reduction and Management Office aron matuki ang ilang rekomendasyon.
Ang Cebu City Disaster Risk Reduction and Management Office nirekomendar nga dili na patunghaan ang Buhisan Elementary School tungod sa dagkong liki nga peligro sa pagdahili sa yuta.
Giklaro ni Garcia nga dili sab sayon sa parte kagamhanan nga makapangita og duol nga relocation site.
“Barangay Buhisan kay puro naman gyud na nga kabukiran ba unya gamay nalang kaayo ang areas diha nga atong matukuran and some areas there are landslide prone but we will talk to the barangay kapitan to find a more suitable place”, suma pa ni Garcia. Ang Principal nga si Gemma Amarillo, kanunay ang kahadlok dili lang sa mga liki apan lakip ang giingong haw-ang o hallow na ang pundasyon niini.
Una niini ang Mines and Geosciences Bureau mirekomendar nga dili na luwas ang maong tunghaan hinungdan nga nakahukom ang CDRRMO nga dili na gayud gamiton ang eskwelahan. (BANAT NEWS)
- Latest
