Piala, Tapales nakahiagum og managlahing kapalaran

CEBU, Philippines — Ang Sugbuanong boksidor nga si Bryx "The King" Piala sa ARQ Stable ug ang kanhi two-time world champion Marlon Tapales sa ZIP/Sanman Boxing sa General Santos City nag-agi og managlahing dalan sa ilang pag-away sa langyawng lapyahan niadtong Sabado, Septimbre 7.

Si Piala gipalukapa sa ikaupat nga hugna sa way pildeng Hapon KO artist nga si Mikito Nakano sa ilang OPBF featherweight title match didto sa Korakuen Hall sa Tokyo, Japan.

Gawas nga misakmit sa korona sa OPBF, si Nakano miinat sab sa perpekto niyang rekord ngadto sa 11-0 nga gidayan-dayanan na karon og 10KOs. Si Piala natagak sa 9-2 uban ang 3KOs human ang ARQ nakatilaw sa ikaunom nilang sagunson nga pilde didto sa Japan. Lahi ang estorya didto sa Olympic Stadium sa Phnom Penh, Cambodia diin si Tapales mikulit og dominanteng kadaogan pinaagi sa unanimous decision human sa 10 ka hugna batok ni Indian challenger Saurabh Kumar aron pagpabiling WBC Asia Continental super bantamweight champion. Si Tapales nagtangag na karon og 39-4 nga baraha uban ang 20KOs, samtang si Kumar naparot sa ikaduha pa lamang nga higayon sud sa 14 ka away uban ang 6Kos.