Cesafi Season 24 UV lancers naglaraw mokulit og laing 3-peat
CEBU, Philippines — Ang University of the Visayas (UV) Green Lancers naglaraw nga mokab-ot og laing 3-peat sa Cebu Schools Athletic Foundation, Inc. (CESAFI) Season 24 men's basketball tournament nga mo-arangkada na karong Sabado, Septiembre 21, diha sa Cebu Coliseum.
Usa ka adlaw human mosikad ang bag-ong season sa liga, ablihan dayon sa two-time defending champion ang ilang kampanya batok sa University of San Jose-Recoletos (USJ-R) Jaguars karong Domingo, Septiyembre 22.
Gipindot man tuod sila nga sayong mga paborito alang sa titulo apan si coach Gary Cortes wala mohatag og taas nga pangagpas kabahin sa ilang tinguha nga maka-grandslam.
"As for our preparations and readiness for the new season, all I can say is that we are doing the same routine that we usually do in the past years," dason pa ni Cortes, nga nakadaog og lima ka korona apil na ang talagsaong 3-peat gikan niadtong 2016 ngadto sa 2018 sud sa pito ka sagunson niyang pagtaak sa finals sukad siya gitudlo nga coach sa Lancers niatong 2015.
Gipangulohan nilang team captain Jimpaul Amistoso ug reigning CESAFI MVP Kent Ivo Salarda, ang Lancers duna gihapoy daghang eksplosibong armas nga ikabuga sama nilang AJ Sacayan, Raul Gentallan, Ivan Clark Alsola, Kenneth Brillo, Joshua Canoy, Christopher Isabelo, ug Jhun Art Marco.
Makalaum sab sila sa mga bag-ong kaplag nilang batos nga sila sa Ethan Maglasang, Steven Cañete, ug Brian Fitcher.
Bisan pa man niini, si Cortes nagpabiling mapaubsanon sa ilang tsansa nga makapanalipod sa ilang trono sa ikatulong sunod-sunod nga higayon.
"We will just play the best we can every game day," kanayon pa ni Cortes. "Whatever the result is at the end of the season, that concludes our 3-peat quest."
- Latest
