BOC nagtala ng pinakamataas na koleksyon sa kasaysayan

MANILA, Philippines — Nagtala ang Bureau of Customs (BOC) ng pinakamataas na buwanang koleksyon sa kasaysayan nito matapos makalikom ng P97.463 bilyon noong Oktubre 2026, sa kabila ng pagbaba ng import volume. Mas mataas ito ng P14.501 bilyon kumpara sa nakolekta noong Oktubre 2025. Naabot din nito ang 99.42 porsiyento ng P98.028 bilyong revenue target para sa buwan.
Umabot naman sa P853.66 bilyon ang kabuuang koleksyon ng ahensya mula Enero hanggang Oktubre, na lumampas sa target na P846.52 bilyon at nagsilbing pinakamataas na koleksyon para sa unang 10 buwan ng taon sa kasaysayan ng BOC.
Ang koleksyon ng BOC ay nakatutulong sa pagpopondo ng mga proyektong pang-imprastraktura, serbisyong pangkalusugan, at iba pang mahahalagang programa at operasyon ng pamahalaan. Sa bawat pisong nakokolekta, nakapag-aambag ang ahensya sa paghahatid ng mga serbisyong nagpapabuti sa buhay ng mga Pilipino, lalo na sa mga komunidad na higit na nangangailangan ng suporta.
Ayon kay Customs Commissioner Ariel F. Nepomuceno, bunga ang bagong rekord ng mas mahigpit na pagsubaybay sa koleksyon, mas maayos na customs administration at dedikasyon ng mga kawani ng ahensya sa buong bansa.
“Ang bawat pisong nakokolekta natin ay may katumbas na serbisyong maihahatid sa ating mga kababayan. Ito ang nagbibigay ng higit na kabuluhan sa ating trabaho,” ani Nepomuceno.
Sinabi rin ng opisyal na nananatili silang kumpiyansa na maaabot ang P1.011 trilyong revenue target sa pagtatapos ng taon. Aniya, kailangan pang makalikom ng mahigit P157 bilyon sa nalalabing dalawang buwan upang maabot ang naturang layunin.
Dagdag pa niya, “Determinado tayong maabot ang P1 trilyong koleksyon at ibibigay natin ang ating pinakamahusay upang makamit ang makasaysayang target na ito para sa bayan.”
- Latest






















