^

Banat Balita

P21.23M gihatag nga ayuda sa Kapitolyo sa mag-uuma ug mangingisda

Jonnavie Villa - Banat

CEBU, Philippines — Nikabat sa P21.23 milyones nga tabang pang-agrikultura ug pangisda ang gipanghatag sa kagamhanan sa Probinsiya sa Sugbo ngadto sa mga benepisyaryo gikan sa 26 ka lungsod ug siyudad isip pagpangandam sa posibleng epekto sa El Niño sa produksiyon sa pagkaon.

Gipangulohan ni Gobernador Pamela Baricuatro ang turnover sa mga kagamitan ug panginahanglanon sa produksiyon niadtong Oktubre 19 ngadto sa Sec. Cerge M. Remonde Sports and Cultural Center sa Barangay Lamacan, Lungsod sa Argao.

Ang tabang gipahigayon pinaagi sa Provincial Agriculture Office (PAO) nga gipangulohan ni Dr. Roldan Saragena.

Lakip sa gipanghatag mao ang 15 ka walking-type agricultural tractors, tulo ka high-density polyethylene (HDPE) fish cages, water pumps nga gipadagan sa gasolina, mga hose alang sa irigasyon, abono, mga binhi ug mga gamit alang sa pagpanalipod sa kadagatan.

Nakadawat usab ang mga benepisyaryo og mga punoan sa cacao, cuttings sa kamote ug nagkalainlaing liso sa utanon nga mahimong gamiton sa pagpadaghan sa mga tanom ug pagpalig-on sa suplay sa pagkaon.

Niapil sa programa ang mga lungsod sa Minglanilla, San Fernando, Sibonga, Argao, Dalaguete, Alcoy, Boljoon, Oslob, Samboan, Ginatilan, Santander, Malabuyoc, Alegria, Badian, Moalboal, Alcantara, Ronda, Dumanjug, Barili, Aloguinsan, Pinamungajan, ug Cordova ug mga siyudad sa Talisay, Naga ug Carcar ug Toledo.

Matud ni Baricuatro nga tumong sa iyang administrasyon nga palig-onon ang lokal nga produksiyon aron mamenosan ang pagsalig sa Sugbo sa mga pagkaong gikan sa ubang lugar ilabi na kon ang taas nga panahon sa huwaw makaapekto sa mga ani.

Gipadayag usab sa gobernador nga hatagan og dugang pagtagad ang sektor sa agrikultura sa sunod tuig aron masiguro ang malungtarong suplay sa pagkaon sa probinsiya.

Gisugyot usab ang paggahin og P400 milyones alang sa PAO sa 2027 apan nag-agad pa kini sa pag-aproba sa Sangguniang Panlalawigan. (BANAT NEWS)

AYUDA

  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with