Libreng bugas gitinguha ni Archival nga maapod-apod sa Nobiyembre

CEBU, Philippines — Tumong ni Cebu City Mayor Nestor Archival nga masugdan sa una o ikaduhang semana sa Nobiyembre 2026 ang pag-apod-apod sa libreng bugas ubos sa Local Government Support Fund–Financial Assistance (LGSF-FA) nga programa sa nasudnong kagamhanan.

Matud ni Archival nga anaa na sa procurement process ang siyudad alang sa pagpalit sa bugas ug gilaoman nga mapadayon kini nga walay problema aron maapod-apod dayon sa mga benepisyaryo.

Ang programa gitumong nga makahatag og tabang sa 20 porsyento sa labing kabus nga mga residente sa siyudad.

Ang mga barangay motabang sa pag-ila ug pag-andam sa listahan sa mga mahimong benepisyaryo.

Sayo pa, gipahibalo ni Konsehal Dave Tumulak nga nadawat na sa kagamhanan sa siyudad ang P145 milyones nga pundo gikan sa nasudnong kagamhanan niadtong Agosto 2026 alang sa food assistance ilabi na ang paghatag og bugas sa indigent individuals ug mga indigent nga pamilya sa Dakbayan sa Sugbo.

Samtang nagpadayon ang procurement process, giandam usab sa siyudad ang pag-ila ug revalidation sa mga mahimong benepisyaryo ilabi na ang mga giila nga poorest of the poor sa siyudad.

Gi-commission ni Archival ang Department of Urban Welfare and Development (DWUP) aron makig-alayon sa urban poor sector sa pag-ila ug pag-andam sa listahan sa mga kabus nga pamilya nga mahimong makabenepisyo sa programa.

Ug kong hapsay ang tanang proseso, gilaoman nga maapod na gyud ang bugas karong Nobiyembre.

Alang kang Archival, ang programa makatabang usab sa iyang food security program sa siyudad pinaagi sa pagpagaan sa epekto sa pagsaka sa presyo sa mga batakang palaliton ilabi na alang sa mga pamilyang nanginahanglan og dugang nga tabang. — /BDB (BANAT NEWS)