Proteksiyon ug suporta sa MSMEs kinahanglang palig-onon – Aquino

CEBU, Philippines — Gikinahanglan ang mas lig-on nga proteksiyon ug suporta alang sa micro, small and medium enterprises (MSMEs), creative workers ug mga empleyado sa mga industriya nga posibleng maapektohan sa paspas nga pag-uswag sa artificial intelligence (AI).

Kini ang mga isyu nga gituki atol sa Senate Finance Subcommittee briefing sa proposed 2027 budgets sa Department of Trade and Industry (DTI) ug Governance Commission for Government-Owned or -Controlled Corporations (GCG).

Nanawagan si Senador Bam Aquino kinsa nangulo sa hearing sa DTI nga maghimo og MSME Protection Desk aron adunay direktang tabang ang gagmay’ng negosyante nga makasinati og harassment, dili makatarunganong paglangan sa proseso ug uban pa’ng problema sa mga regulatory agency sa gobiyerno.

Matud ni Aquino nga dili lang pinansiyal nga tabang, training ug uban pa’ng serbisyo ang gikinahanglan sa mga MSME apan proteksiyon usab sa pag-atubang sa mga ahensiya sa gobiyerno. Giduso ni Aquino ang dugang suporta alang sa Filipino creative talents ug lokal nga mga produkto nga gustong makasulod sa international market.

Gikompara niya ang panginahanglan sa Pilipinas sa suporta alang sa creative economy ngadto sa mga programa sa South Korea nga nagtutok sa pagpalambo ug pagdala sa ilang creative industry ngadto sa global market. Gitumbok usab sa senador ang panginahanglan nga dili mahimong dugang pas-anon sa gagmay’ng online sellers ang mga proposed fee ug requirement alang sa online businesses.

Iyang gisugyot nga ang verification mark alang sa gagmay’ng negosyo mahimong boluntaryo aron malikayan ang dugang gasto ug komplikadong proseso. Sa hearing, gipadayag usab ang kabalaka sa posibleng epekto sa AI sa mga trabaho, ilabi na sa business process outsourcing (BPO), semiconductor ug manufacturing sectors.

Si Aquino niawhag nga kinahangla’ng maandam daan ang mga trabahante pinaagi sa reskilling ug training programs aron makat-on sila og bag-ong teknolohiya ug makabalhin sa ubang trabaho nga dili dali maapektohan sa automation.

Si Aquino nipasidaan nga bisan 10 porsyentong pagkunhod sa BPO ug semiconductor industries mahimong makaapekto sa gibana-banang 100,000 ngadto 200,000 ka trabaho.

Matud usab ni Aquino nga dili lang sa BPO industry kinahanglang tan-awon ang mga oportunidad alang sa mga trabahanteng mawad-an og trabaho tungod sa AI.

Gideklara usab nga submitted for plenary consideration ang proposed budgets sa DTI ug GCG.

Gisaad sa senador nga iyang suportahan ang dugang pundo alang sa mga programa sa MSMEs, creative economy ug mga trabahante lakip ang trade fairs, shared service facilities, Negosyo Centers ug Negosyo Center Online. — /BDB (BANAT NEWS)