CECABA All Stars misilyo sa No.1 seed uban ang 6-0 sweep
CEBU, Philippines — Ang Cebu Eastern College Alumni Basketball Association (CECABA) All Stars mipakaging og usab sa Wednesday Club, 99-84, aron pagkumpleto og 6-0 sweep sa duha ka hugna nga eliminasyon sa 1st Edgar Cokaliong Memorial Basketball Tournament nga gipaluyohan sa Shell Pilipinas Corporation sa Don Edgar Stadium sa Cokaliong Tower.
Si Mark Eugene Bukiron mipaulbo og 39 puntos, si BJ Zosa mi-iskor og 20 samtang si Chester Cokaliong midugang og 15 puntos sa dihang ang CECABA miangkon sa No.1 seed ug twice-to-beat advantage sa semifinals.
Si Bukiron mibubo og 14 puntos sa unang kuwarter aron pangulohan ang Easternians ngadto sa sayong 26-15 nga labva.
Si Zosa mipabuto dayon og 18 puntos sa ikatulong kuwarter sa dihang nakuha og balik sa CECABA ang double-digit nilang bentaha, 74-64, padung sa pinal nga 10 minutos.
Sila si Bukiron ug Cokaliong nagkumbinar og 25 sa 27 puntos sa CECABA sa katapusang kuwarter aron silyohan ang impresibo niyang 15 puntos nga kadaogan.
Nadoble ang kalbaryo sa Wednesday Club kay nahagba sab sila sa mga kamot sa Toyota Mandaue North, 85-78, sa sunod nilang duwa.
Si JP Batac mikadlit og 19 puntos samtang sila si Jaymar Gapo ug Dionesio Espinosa nagkumboya'g 29 puntos alang sa Toyota Mandaue, nga miinat sa ilang rekord ngadto sa 3-2.
Ang Toyota Mandaue maoy mikontrola sa dagan sa duwa gikan sa pagsugod ug wala na sila molingi pa sukad miabante og 14 puntos, 43-29, sa halftime.
Sila si Alvin Bustos ug Cyfandel Amora miposte og 18 puntos matag usa alang sa Wednesday Club apan nakawang ang ilang paningkamot.
Mga iskor
CECABA All Stars (99) - Bukiron 39, Zosa 20, Cokaliong 15, Bauya 9, Dy Teves 8, JJ Yu 6, Gabatan 2, Tan 2
Wednesday Club (84) - Kobe 21, Amora 18, Tabz 14, Viliran 8, Ceballos 8, Tero 6, Stella 6, Tadefa 4
Quarterscores: 26-15; 43-39; 74-64; 99-84
- Latest
