UV Lancers ug USC Warriors mipayaka sa ilang mga kontra

CEBU, Philippines — Ang four-time champions University of the Visayas (UV) Green Lancers ug ang University of San Carlos (USC) Warriors mipakaging sa tagsa-tagsa nila ka mga kontra sa Cebu Schools Athletic Foundation, Inc. (CESAFI) Season 26 basketball tournament niadtong Sabado sa gabii, Septiyembre 19, sa Cebu Coliseum. Si Ivan Clark Alsola mikadlit og 14 puntos, lima ka rebounds ug usa ka assist, samtang si Season 2024 MVP Raul Gentallan midugang og 13 puntos, upat ka rebounds ug lima ka assists sa dihang ang Lancers miinat sa ilang rekord ngadto sa 2-1. Ang mga batos ni coach Gary Cortes milabaw og 28 puntos sa second half sa wala pa nila pakganga ang

madasigong resbak sa USJ-R sa naghinapos nga bahin aron molakaw ngadto sa otso puntos nga kadaogan.

Misidlak si John Onin Nonay uban ang 20 puntos, lima ka rebounds, duha ka blocks ug usa ka steal, apan wala kini igo aron paglikay sa Jaguars nga makatilaw sa ikatulo nilang pildi sa upat ka duwa.

Sa laing bahin, ang USC Warriors ubos sa pagtimon ni coach Paul Joven mikastigo sa University of Cebu Lapu-Lapu and Mandaue (UCLM), 73-54.

Si James Paolo Gica mipupo og 19 puntos, upat ka rebounds, lima ka steals ug usa ka assist alang sa Warriors, nga nagkupot na karon og 3-1 nga baraha.

Midugang si Rey James Enriquez og 13 puntos, upat ka rebounds, tulo ka assists ug duha ka steals, samtang si James Tawacal mitampo og 11 puntos ug lima ka rebounds alang sa Warriors, nga wala na molingi pa sukad miabante og 11 puntos, 41-30, sa halftime.

Si Wade Adam Luche mihipos og 14 puntos, lima ka rebounds ug usa ka steal, samtang si Marty Louisse Sotto mitapo og 11 puntos ug tulo ka rebounds, apan sa walay kapuslanan kay ang UCLM natagak sa 1-4.

Sa juniors division, ang University of Cebu (UC) Junior Webmasters ug Cebu Institute of Technology-University (CIT-U) Junior Wildcats milampornas sa ilang mga kaatbang.

Si Jade Bialan mikulit og double-double nga 25 puntos ug 15 rebounds uban ang duha ka assists, usa ka steal ug lima ka blocks aron pangunahan ang Junior Webmasters ngadto sa 105-68 nga demolisyon sa Don Bosco Greywolves. Sila si Gamaliel Chaz de la Peña, Jay Xander Bulagsak ug Mark Jovil Datoon nagkumbinar og 36 puntos aron bitaron ang UC sa ikaduha nilang daog sa tulo ka duwa. Ang Greywolves nagpabiling walay daog human sa tulo ka sinugdanan.

Sila si Skeril Miez Basilisco ug Peter James Brobo parehong mirehistro of double-double aron ibandera ang Junior Wildcats ngadto sa 103-59 nga paglampaso sa San Roque College de Cebu (SRCDC) Greyhounds. Si Basilisco miharos og 19 puntos ug 11 rebounds uban usa ka assist, lima ka steals ug usa ka block, samtang si Brobo mikolekta og 17 puntos, 10 rebounds, tulo ka assists ug usa ka steal aron itulod ang Junior Wildcats ngadto sa ikatulong pwesto sa standings bitbit ang 3-1 nga marka.