‘Kanyon’ na ebidensiya vs VP Sara abangan - Ridon

MANILA, Philippines — Itinuturing na “smoking gun” ng prosekusyon ang naging testimonya ni dating Office of the Vice President (OVP) Special Disbursing Officer Gina Acosta sa impeachment trial ni Vice President Sara Duterte, ayon kay House prosecutor Terry Ridon ng Bicol Saro Partylist.

“I think we’re expecting several smoking guns, but you have to wait for the cannon,” ani Ridon sa News Forum sa Quezon City nitong Sabado.

Ayon kay Ridon, kuntento ang prosecution team sa mga isiniwalat ni Acosta, na idineklara bilang hostile witness sa Senate impeachment court noong nakaraang linggo.

“We are very much satisfied with how Ms. Acosta actually answered this week. Tingin ko po, ‘yung kanyang testimonya, isa sa mga smoking gun nitong paglilitis,” dagdag niya.

Sa kanyang pagtestigo, sinabi ni Acosta na mismong si VP Duterte ang nag-utos sa kanya na ibigay ang P125 milyong confidential funds kay Col. Raymund Dante Lachica, na hindi organic personnel ng OVP.

Inilahad ni Acosta na ang turnover ng pondo ay naganap matapos ma-withdraw ang pera noong Disyembre 2022.

Binanggit ni Ridon na ang naturang transaksiyon ay nakapaloob sa Commission on Audit (COA) notice of disallowance, na nagpalakas sa argumento ng prosekusyon sa Articles of Impeachment laban kay VP Duterte.

“’Yan po basically ‘yung pinagtitibayan doon po sa COA notice of disallowance. Bakit nila ’yan binigay sa isang non-organic OVP personnel?” ani Ridon.

Binigyang-diin pa ni Ridon na ang testimonya ni Acosta ay nagbigay nang malaking piraso ng ebidensya na direktang nagsasangkot kay VP Duterte sa pag­lilipat ng confidential funds.