Pasabog na ‘kanyon’ vs VP Sara ikakasa sa impeachment trial - Ridon

MANILA, Philippines — Ikinakasa na ang tinawag na pasabog na kanyon ng ebidensya laban kay Vice President Sara Duterte kasunod ng “smoking gun” na testimonya ni dating Office of the Vice President (OVP) Special Disbursing Officers (SDOs) Gina Acosta impeachment trial sa Senado.

“I think we’re expec­ting several smoking guns, but you have to wait for the cannon,” giit ni House prosecutor Terry Ridon, kinatawan ng Bicol Saro Partylist sa News Forum sa Dapo Restaurant sa ­Quezon City nitong Sabado.

Inihayag ni Ridon na kuntento ang prosecution team sa mga isiniwalat ni Acosta, isang hostile witness sa pagtayo nito sa witness stand ng Senate impeachment court noong nakalipas na linggo.

“We are very much sa­tisfied with how Ms. Acosta actually answered this week. Tingin ko po, ‘yung kanyang testimonya, ang talagang isa sa mga smoking gun nitong paglilitis po na ito,” ani Ridon.

Sinabi ni Ridon na direktang itinuro ni Acosta si VP Sara na nag-utos sa kaniya na ibigay ang P125 milyong confidential funds kay Col. Raymund Dante Lachica na hindi orga­nikong OVP personnel.

Si Acosta ay tumestigo sa Senate impeachment court na isiniwalat na si VP Duterte ang nagbigay ng instruksiyon sa kaniya na iturnover ang P125 milyong confidential funds kay dating OVP security officer Co. Lachica matapos na mai-withdraw ang pera noong Disyembre 2022.

“Yan po basically ‘yung pinagtitibayan doon po sa COA notice of disallowance. Bakit nila ’yan binigay sa isang non-organic OVP personnel?” ani Ridon kung saan ang pagtestigo ni Acosta ay nagpalakas aniya sa confidential funds na kabilang sa inihaing Articles of Impeachment ng prosecution team para mahatulan ang Bise Presidente.