Parcel ng droga, isinuko ng 2 rider sa pulis

MANILA, Philippines —  Pinuri ng National Capital Region Police Office (NCRPO) ang pagsurrender ng dalawang delivery rider sa kahina-hinalang parcel sa halip na ideliber na nadiskubreng iligal na droga sa Barangay Parang, Marikina City, gabi ng Biyernes.

Ang ‘di tinukoy na mga rider ay nakatakdang magdeliber ng package alas-11:00 ng  gabi ng Setyembre 18, ngunit dahil sa hinala ay ipinakita muna sa nadaanan nilang pulis, na siyang sumuri at nakatuklas na naglalaman ng 28 gramo ng kush, 2 pakete  ng marijuana na may fruiting tops na 800 gramo at 9 na assorted marijuana oil cartridges na may 9 ml.

Nasa kabuuang P150,000 ang halaga ng nakumpiskang iligal na  droga, na sinaksihan ng mga opisyal ng barangay na dinala sa Station Intelligence Section ng Marikina City Police Station.

Ikinatuwa ni NCRPO chief, P/Brig. Gen. Christopher Abrahano ang pakikipagtulungan ng komunidad sa pulisya sa pagpuri sa dalawang rider, sa pagpapakita ng magandang halimbawa ng huwarang mamamayan.