Ang duha ka nawong sa ayuda sa katawhan

Mibisita si Presidente Ferdinand Bongbong Marcos sa Barangay Talay sa dakbayan sa Dumaguete sa lalawigan sa Negros Oriental niadtong nakalabay’ng adlaw ug ako usab ang nadestino didto aton i-cover ang programang giulohan og "Bawat Bayan Makikinabang." Nangunay siya sa pagpang-apod-apod sa tag 10 kilos nga bugas humay ngadto sa mga tawo nga nahisakop sa marginalized sector ug nanghatag usab siya og scholarship aid nga tag 20 mil pesos.

Kabahin sila sa 386,000 ka mga kabus nga makaambit niining maong programa sa 557 ka baranggay sa Negros Oriental. Gihangop kini sa mga tawo apan nanghinaut sila nga mapadayon kining maong programa dili lang kausa ka higayon.

Igo na ba ang usa ka sakong bugas ug dyutay nga pondo para sa barangay aron mawala ang kakabos, o igo ra kini aron pahilumon ang gigutom nga tiyan sulod sa pipila ka adlaw? Kini ang pangutana nga tataw kaayo ang tubag nga usa lang kini ka band-aid solution kay pila ra man ang espirito aning 10 kilos nga bugas ilabi na kong daghan ang miembro sa pamilya.

Kon tan-awon nato ang brighter side ani, dako ug diretso ang tabang niini sa mga pamilya. Ang paghatag og 10 ka kilo nga bugas ug P20,000 nga educational assistance sa mga iskolar sa Barangay Talay ug uban pang dapit sa Negros Oriental dako nga ginhawa para sa mga labing nagkinahanglan. Dugang pa, ang ?200,000 nga direktang pondo kada barangay—nga moabot sa 557 ka barangay sa lalawigan ug kapin sa 8,000 sa tibuok nasod—usa ka maayong lakang aron mahatagan og gahum ang lokal nga pamunoan nga matubag ang ilang kaugalingong panginahanglan.

Apan ayaw usab nato kalimtan ang dark side niini, ang 10 ka kilo nga bugas temporaryo ra kaayo nga solusyon. Dili kini makasulbad sa pundamental nga tambal sa kakabos—ang kakuwang sa trabaho ug ubos nga sweldo. Kon sige ra kita sa dole-out nga walay lig-ong plano sa panginabuhian ug industriyalisasyon, naghimo ra kita og komunidad nga kanunay magdepende sa ayuda sa gobyerno.

Dili usab malikayan ang pagduda kon kini ba usa ka political patronage o pagpasiugda sa politika gamit ang pondo sa lungsod, ilabi na nga ang Presidente mismo ang nagpahigayon sa paghatag niini.

Ug ang labing dako nga pangutana: unsa ka sigurado ang transparency sa pagpadagan sa minilyon nga pondo aron masiguro nga dili kini matuok sa korapsyon sa matag lokal nga opisyal?

Ang ayuda tambal ra sa nag-antos nga katilingban. Dili kini sayop, apan kon walay permanenteng tambal ug suporta sa panginabuhian, magpabilin kitang maghangad nga magnganga magpabot sa ayuda.