EDITORYAL — Pasa lang ang problema?

Patong-patong ang gisagubang nga problema sa Cebu City karon, nag-una niini ang problema kung asa ilabay ang basurang makolekta kada adlaw human nga wala na palabaya ang siyudad diha sa Binaliw Landfill.

Naa pa gyuy problema sa baha matag mobunok ang ulan kay pirmeng moawas ang tubig padung sa kadalanan ug mga kabalayan.

Naa pay laing problema bahin anang mag-usa ka dekada ng konstruksyon sa Cebu City Medical Centernga pirme lang madelatar ang pagtrabaho tungod sa pagusab-usab ug uban pa.

Lain pang problema kaning kakulang sa suplay sa tubig sa bukirong mga barangay nga dunay mga umahan epekto aning El Niño, problema traffic, problema sa kakulang sa mga lawak-saringan  ug mga magtutudlo sa mga public schools ug uban pa.

Dili daw angay basulon si Cebu City Mayor Nestor Archival sa mga problemang gisagubang karon sa dakbayan, mao nay hangyo sa iyang chief of staff nga si Kenneth Siasar.

Ang rason, dili daw si Archival ang nagmugna aning mga problemang giatubang karon sa siyudad, naabtan ra daw niya ni gikan sa gisundang mga mayor sa dakbayan.

Imbes daw manaway, giawhag niya ang publiko nga tabangan ang mayor kung unsaon, pinaagi sa paghatag og mga ideya kun unsaon pagsulbad ang matag problema.

Husto si Siasar nga dili si Archival ang nagmugna aning tanang problemang giatubang sa siyudad kay nasunod lang niya ni gikan sa nangaging mga administrasyon. Apan kinsa man diay  nga si Archival man maoy galingkod karon? Dili ba siya maoy mas naay kapasidad para korihian kaning tanan?

Nidagan siya pagka-mayor ug siyay gipili sa mga tawo para sa maong posisyon kay sa ilang tan-aw, haom siya para niini ug iyahang sulbaron kining mga problemaha. Nasayup diay ang mga tawo pagbotar sa iya? Wala diay planong masolusyonan sa daling panahon kaning tanang problemaha?

Usa pa, nganong sa katawhan man mangayo og ideya nga daghan mang mga eksperto diha sa City Hall, unya kung mohatag og ideya ang mga tawo paminawon kaha?

Kung di ni mapangitaag solusyon karon, sa ato pa mapasa napud ni sa kung kinsa sunod nga ma-mayor sa Cebu City?