P265M nga SARO nadawat sa Probinsiya sa Sugbo

CEBU, Philippines — Nakadawat ang Cebu Provincial Government og P265 milyon nga Special Allotment Release Order (SARO) gikan sa national government atol sa pagbisita ni Executive Secretary Ralph Recto sa Cordova, Cebu niadtong Huwebes.

Personal nga gitunol ni Recto kang Cebu Gov. Pamela Baricuatro ang SARO, nga gi-isyu sa Department of Budget and Management (DBM). Ang SARO usa ka opisyal nga awtorisasyon nga nagtugot sa provincial government sa pag-incur og obligations ug paggamit sa pondo alang sa mga programa ug proyekto nga giaprobahan sa gobyerno.

Matud ni Baricuatro, gamiton sa probinsya ang pondo alang sa mga proyekto nga nagpunting sa panglawas, enerhiya, farm-to-market roads ug food security.

“It's going to be health, energy, farm to market roads and also food security,” matud ni Baricuatro sa dihang gipangutana kung asa nga mga proyekto ipunting ang pondo.

Gipasalamatan sa gobernador ang national government, ilabi na si Presidente Ferdinand “Bongbong” Marcos Jr. ug si Recto, tungod sa tabang nga gihatag sa probinsya.

Samtang, gipadayag ni Recto ang importansya sa Cebu sa ekonomiya sa nasud ug ang dakong kontribusyon niini sa national growth. “I am very happy to be here. Napakadali ng aking trabaho working with Governor Pamela here in the province. Cebu is one of the most important provinces in the country. Malaki ang ambag nito sa national growth ng Pilipinas,” matud ni Recto.

Gihisgutan usab ni Recto ang mga kalamidad nga nakaigo sa Cebu, lakip ang linog ug bagyo, ug miingon nga mobalik sa probinsya si Presidente Marcos sa umaabot nga mga semana aron maghatag og dugang tabang sa mga lugar nga naapektuhan.

Apan matud ni Recto, dili lang temporaryong ayuda ang gikinahanglan aron masulbad ang dugayng mga problema sa katawhan.

Gawas sa SARO, adunay usab distribution sa rice assistance diin 3,194 ka beneficiaries gikan sa nagkalain-laing sektor ang nakadawat, lakip ang fisherfolk, single parents, senior citizens ug transport sector.

Matud ni Baricuatro, ang food security ug pakigbatok sa kagutom nagpabiling prayoridad sa provincial government, ug ang mga programa sa national government makatabang sa ilang mga inisyatibo.

Ubos sa Local Government Support Fund (LGSF), nakadawat ang Cebu Province og kinatibuk-ang P720 milyon—P360 milyon alang sa Bagong Pilipinas Rice Program ug laing P360 milyon alang sa mga infrastructure projects sama sa farm-to-market roads, local roads, water supply ug sanitation projects, ug multipurpose buildings. Ang Cebu City nakadawat usab og P300 milyon ubos sa LGSF, samtang ang Cordova nakadawat og P25 milyon alang sa rice assistance ug pagpaayo sa multipurpose building sa Barangay Poblacion. (BANAT NEWS)