CCMC daghan pang kinahanglang ayuhon

CEBU, Philippines — Padayon ang pag-ayo ug pagkompleto sa Cebu City Medical Center (CCMC) samtang giatubang sa kagamhanan ang pipila ka teknikal ug legal nga isyu nga nalambigit sa mga nahibiling trabaho sa tambalanan.

Kini nga update gikan ni Mayor Nestor Archival ug sa chief of staff niini kinsa mao sab ang CCMC administrator nga si Kenneth Siasar atol sa press conference kagahapon, Oktubre 5, 2026.

Matud pa ni Siasar nga ang kasamtangang kontraktor ug sa mga city engineer maoy nagpadayon sa trabaho sa mechanical, electrical, plumbing ug fire protection (MEPF) systems sa building.

Apan pipila niini ang giingong adunay mga problema sa pagsunod sa orihinal nga specifications sa proyekto.

Lakip sa gikabalak-an ang busduct system nga gigamit isip electrical connection gikan sa main transformer paingon sa mga electrical panel sa matag andana.

Matud pa ni Siasar nga ang na-install nga busduct wala mosunod sa gitakdang specifications ug napakyas usab sa testing nga gihimo sa mga engineer.

Ang maong isyu kinahanglan pa og hustong dokumentasyon ug giya gikan sa Commission on Audit (COA) ilabi na tungod kay adunay mga nakita sa report niadtong 2025 mahitungod sa agi sa trabaho sa mga nag-unang kontraktor sa wala pa ni-take over ang Dakay Construction and Development Corporation niadtong Pebrero 2026.

Apil sab sa nakita nga mga problema ang pipila ka bahin sa mechanical ug fire protection systems, lakip ang mga piping, fire protection components ug standpipe riser nga giingong wala kompleto o wala nakasunod sa gikinahanglang standard.

Mao nga paimbestigaran ni Archival ang mga kontraktor tungod kay wala masunod kung unsa ang anaa sa orihinal nga plano. Mangayo sab og tabang ang kagamhanan sa COA aron unsaon paghan-ay pagbalik sa kahimtang sa tambalanan ug hingpit nga mahuman ang konstraksyon.

Bisan pa sa mga kakulian mga nakita sa mga gipang-hire nga consultant ug sa COA, dako na ang nahimo sa building. Kumpleto na ang ikatulo ug ang ikalimang andana samtang 80% na ang nahuman sa ikaupat nga andan.

Nakumpleto sab ang mga cubicle ug mga lawak lakip ang mga lugar alang sa ICU apan wala pa gi-install ang pipila ka mga pultahan aron malikayan nga madaot samtang nagpadayon pa ang konstruksyon.

Nahuman na usab ang ramp beam sa vehicle ramp area nga gigamit sa paghatod sa mga pasyente ngadto sa emergency room. Sa pagkakaron, paningkamutan sab sa kagamhanan nga masulbad ang mga problema sa elektrikal aron luwas gamiton ang CCMC. (BANAT NEWS)