Dunay warrant nisukol, napatay sa mga polis

CEBU, Philippines — Patay ang usa ka lalaki human giingong  nipusil sa mga pulis nga nagpatuman og search warrant diha sa iyang balay sa Barangay Pulang Bato, Cebu City, sayo sa buntag niadtong Martes, Hulyo 15.

Matud sa Criminal Investigation and Detection Group Regional Field Unit 7 (CIDG RFU7), ang search warrant gi-isyu sa Regional Trial Court sa Cebu City tungod sa giingong paglapas sa Comprehensive Firearms and Ammunition Regulation Act.

Gibutyag sa CIDG nga ang ilang Cebu City Field Unit maoy nangulo sa operasyon ubos sa OPLAN Paglalansag Omega, uban sa tabang sa Cebu City Intelligence Team sa Regional Intelligence Unit 7 (RIU 7), Cebu City Mobile Force Company-Special Weapons and Tactics (SWAT), ug sa Talamban Police Station.

Sa dihang gisilbi na ang search warrant, giingong misulay’g ikyas ang suspek ug kalit nga iyang gipamusil ang mga operatiba.

Tungod niini, napugos ang mga pulis sa pagbalos og pusil kaniya hinungdan sa pagkaigo niini.

Gidali siya’g dala  sa tambalanan apan gideklarar siyang dead on arrival sa mga doktor.

Atol sa operasyon, narekober sa mga operatiba ang usa ka kalibre .45 nga pistola, mga bala, usa ka basiyo sa bala, usa ka sachet nga adunay gituohang shabu, ug nagkalainlaing drug paraphernalia.

Gawas niini, giila usab sa kapulisan nga ang napatay usa sa mga respondents sa kaso sa pag-kidnap sa usa ka negosyante sa Sugbo niadtong Mayo 2026.

Base usab sa rekord sa kapulisan, nadakpan sa mga kaso nga murder, paglapas sa Comprehensive Firearms and Ammunition Regulation Act, ug paglapas sa gun ban sa Commission on Elections (Comelec) ang suspek.

Dugang pa sa CIDG, ang tibuok operasyon narekord pinaagi sa body-worn cameras ug laing recording device isip pagsunod sa lagda sa Korte Suprema alang sa paggamit niini atol sa police operations.—  IBM BANAT NEWS