Trust rating ni Marcos nitibugsok
CEBU, Philippines — Samtang nagkaduol na sa iyang ikalimang State of the Nation Address (SONA), nikubos ang public trust rating ni Presidente Ferdinand Marcos Jr. sumala pa sa survey Social Weather Stations (SWS) atong Hunyo 2026.
Matud pa sa SWS, ang trust rating ni Marcos nikubos ngadto sa 34%, nikubos ni og usa ka porsiyento gikan sa 35% nga iyang nakuha sa buwan sa Marso 2026.
Gipakita sab sa survey nga 45% sa mga Filipinos gamay ra og pagsalig kaniya, samtang 19% nagpabiling wala pa nakadesider.
Ang pinakabag-ong trust rating ni Marcos layo kaayo sa iyang nakuhang 64% sa bulan sa Hulyo atong 2024.
Naka-rekober hinuon ni ngadto sa 48% sa Hunyo 2025, apan nagpadayun ang pagtibugsok sa nisunod pang mga surveys nga karon niabot nalang og 34% sa bulan sa Hunyo ning tuiga.
Kun itandi kang Vice President Sara Duterte nga nag-atubang karon og impeachment trial sa Senado, namentinar niini ang high level nga public trust pinaagi sa nakuha niyang 57%.
Wala kini nausab sukad pa atong Marso 2026 survey. Pero naay 27% nga walay salig niya unya 15% sad ang wala pa makadesider.
Si Stratbase Institute President Victor Andres "Dindo" Manhit niingon nga kaning bag-ong survey makapamata unta sa administrasyong Marcos.
Para ni Manhit, kaning ikalimang SONA sa presidente karong Hulyo 27, pwede niyang gamiton para matubag ang mga nagkadaghang pangutana ug kabalaka sa publiko ug klaruhon kung unsa iyang mga prayoridad sa nahibiling mga tuig sa iyang termino.
"As President Marcos prepares to deliver his fifth SONA, Filipinos will be looking not for rhetoric but for a clear plan to address the issues that affect their daily lives," pasabot pang Manhit. — /IBM (BANAT NEWS)
- Latest
