“Permanent stalls” sa Carbon nakamugna og kahugaw    

CEBU, Philippines — Nadiskubrihan sa konseho sa siyudad sa Sugbo ang permanenteng puwesto sa mga ambulant vendors nga gitukod ibabaw sa mga sidewalk ug drainage canal sa Carbon Market nga nakamugna og seryosong problema sa sanitasyon.

Kini nakit-an atol sa executive session nga gihimo niadtong Hunyo 23, samtang ang mga konsehal padayon nga nag imbestigar sa giingong sobra sobra nga koleksyon sa merkado.

Gipresentar ni Konsehal Joel Garganera ang mga litrato ug bidyo gikan sa Unit 1 o wet market area nga nagpakita sa kapin 24 ka puwesto nga gitukod diretso ibabaw sa drainage canal sa usa ka gilapdan nga bahin sa estruktura sa merkado.

Gisaysay ni Garganera nga nitaho ang Department of Public Services nga naglisod kini sa paghinlo sa maong lugar nga adunay nagtigum nga tubig nga nahimong puy-anan ug breeding ground sa mga ilaga.

Si Carbon Market Administrator Elcon Concha nibutyag nga ang mga ambulant vendors ang naggamit sa maong mga puwesto apan nilalis si Garganera tungod kay matud pa nga permanente na ang mga estruktura.

Base sa bidyo nga gipakita, gihulagway ni Konsehal Pastor “Jun” Alcover Jr. nga ang maong lugar dili lang tindahan sa mga ambulant vendor tungod kay sama sa giingon ni Garganera nga permanente na ang estruktura.

Apan nipasabot sab si Carbon Supervisor Irenea Geneston nga ang mga vendors gibalhin ngadto sa maong lugar atol sa road widening project sa M.C. Briones Avenue niadtong 2023. Gibutang kini kaniadto duol sa karaang police station ug opisina sa Cebu Market Vendors Multipurpose Cooperative (CEMVEDCO).

Matud ni Geneston, dili mahimong basta-basta papahawaon ang mga vendors mao nga gibalhin sila ngadto sa kasamtangang lokasyon.

Dugang pa nga adunay rekomendasyon kaniadto gikan sa Office of the City Markets nga magtukod sila og gagmayng mga puwesto. Apan giangkon usab niya nga lisod ang pagpatuman sa kahinlo tungod sa mga sakyanan nga nagparada ug sa pipila ka vendors nga dili motuman sa mga lagda sa sanitasyon.

“Naa man guy uban ana nila nga gahi kaayo inig tinglimpyo na, mao nang naglisod gyud mi,” matud pa niya. Lakip sa posibleng nakadugang sa kadaghan sa mga vendors ang pagpalapad sa night market sa M.C. Briones Avenue panahon sa administrasyon ni kanhi mayor Michael Rama niadtong Mayo 2023. Niadtong panahona, gibana-banang kapin usa ka libo ka ambulant vendors ang gibalhin gikan sa dalan Plaridel, Manalili, Gonzales ug Magallanes ngadto sa bag-ong giila nga vending area aron mapahapsay ang trapiko ug madani ang mas daghang mamalitay sa Carbon Complex samtang nagpadayon ang redevelopment niini.

Gawas sa problema sa sanitasyon, gitudlo sab ni Alcover nga ilegal ang pagtukod og permanenteng mga estruktura sa sidewalk nga walay tukmang permit.

Si Konsehal Sisinio “Bebs” Andales miingon nga kinahanglan pahugtan sa market administration ang pag-atubang sa mga ilegal nga estruktura ug nisuporta nga mas maayo nga pangtangtangon kini. (BANAT NEWS)