Cebu City nangandam na sa ting-uwan

CEBU, Philippines — Gihingusgan karon sa kagamhanan sa Dakbayan sa Sugbo ang mga operasyon sa desilting, paglimpiyo sa mga estero ug agianan sa tubig sa sapa ug pagpaayo sa drainage system isip kabahin sa pagpangandam sa umaabot nga ting-uwan ug aron mamenosan ang peligro sa pagbaha sa mga dapit nga kanunay maapektohan sa higayon nga mobunok ang uwan.

Gipakatap ang nagkadaiyang action team nga gilangkuban sa mga kawani gikan sa nagkadaiyang buhatan sa siyudad ug mga kaabag nga ahensiya ngadto sa mga lugar nga iladong bahaon sama sa mga barangay sa Kalubihan, Sto. Niño, Tejero, San Roque, Pari-an,Tinago ug Ermita.

Nagpadayon usab ang pagpanglimpiyo ug pag-ayo sa drainage diha sa Leon Kilat Street, M.J. Cuenco Avenue, Bonifacio Street, Sikatuna Street, Carbon Area, ug sa mga kasikbit nga kanal ug agianan sa tubig.

Gitutokan karon sa operasyaon mao ang pagtang-tang sa lapok, basura, ug uban pa’ng mga nakababag sa hapsay nga pagdagan o pagpadagayday sa tubig.

Gilaoman nga pinaagi niini, molambo ang kapasidad sa drainage system ug malikayan ang pagtipon-og sa tubig panahon nga mobunok ang uwan.

Matud pa ni Mayor Nestor Archival, Sr. nga mahinungdanon ang sayo nga pagpangandam aron mapanalipdan ang mga lugar nga dugay na nga nakasinati og grabeng pagbaha matag ting-uwan.

Gipasiugda usab niya ang kamahinungdanon sa padayon nga koordinasyon sa mga ahensiya ug kooperasyon sa publiko alang sa malampusong flood mitigation program. BDB BANAT NEWS