Lapu-Lapu nipalig-on sa pagpanalipod sa kalikupan

CEBU, Philippines — Ang kagamhanan sa Dakbayan sa Lapu-Lapu padayon nga nagpalig-on sa ilang  pagpanalipod sa kalikupan ug sa paghatag gahum sa kabatan-onan pinaagi sa nagpadayon nga mga inisyatibo nga nagpalambo sa konserbasyon sa kadagatan ug sa malungtarong pagdumala sa mga baybayon.

Si Mayor Ma. Cynthia “Cindi” King-Chan, City Environment and Natural Resources Office (CENRO) kaabag ang Department of Environment and Natural Resources (DENR)- 7, malampusong nipahigayon sa “Ecovibe: Kabataan para sa Kalikasan” niadtong Hunyo 9, 2026 usa ka environmental awareness initiative nga nagtigom sa opisyales sa Sangguniang Kabataan gikan sa nagkalain-laing barangay sa siyudad.

Ang programa nagtumong sa paghatag sa mga batan-ong lider og mas lawom nga kahibalo ug praktikal nga pagsabot sa konserbasyon sa marine biodiversity, malungtarong pamaagi sa pag-atiman sa baybayon ug sa mga nag-unang hagit sa marine ecosystems.

Ang mga partisipante niapil sa mga sesyon nga naghisgot sa marine biodiversity, pagdumala sa Crown-of-Thorns Starfish (COTS) ug kahibalo sa kaluwasan batok sa box jellyfish ug uban pa’ng makadaot nga marine stingers.

Gipadayag ang mahinungdanong papel sa kabatan-onan sa pagpanalipod sa coral triangle, usa sa pinakadato nga sentro sa marine biodiversity sa tibuok kalibutan.

Si DENR-7 Executive Director Laudemir Salac nipasabot sa kamahinungdanon sa Lapu-Lapu City isip kaabag sa pagpalig-on sa partisipasyon sa kabatan-onan sa mga inisyatibo sa kalikupan nga nag-ila sa dakong papel sa mga batan-ong lider sa paghulma sa malungtarong komunidad.

Si CENRO officer-in-charge Jocelyn Abayan nipadayag sa kamahinungdanon sa padayon nga partisipasyon sa komunidad sa pagpanalipod sa marine ecosystems taliwala sa nagkagrabeng mga hagit sa kalikupan sama sa climate change, polusyon ug dili malungtarong pamaagi.

Sa laing bahin, si SK Councilor Kyle Alegres sa Barangay Pusok, usa sa mga partisipante nipakita sa kamahinungdanon sa panaghiusa ug kolektibong responsibilidad sa aksyon alang sa kalikupan ug nipadayag nga ang tinuod nga kausaban magsugod sa hiniusang pasalig. BDB BANAT NEWS