Danao Police gipasidunggan
CEBU, Philippines — Gipasidunggan ang Danao City Police Station sa Amerika nunot sa ilang pagsikop sa usa ka Amerkanong pugante sa Sugbo niadtong Hunyo 3, 2026.
Ang maong pasidungog pormal nga gitunol niadtong Miyerkules sa Danao Police Station headquarters sa Barangay Poblacion ni Ms. Thea Amaya, ang representante sa U.S Department of State Diplomatic Security Service.
Ang 44-anyos nga Amerikanong pugante nga gideklarar nga undesirable alien, nag-atubang og mga kasong kriminal sa Amerika nga naglakip sa threats to publish intimate visual material ug attempted aggravated assault with a deadly weapon.
Ang warrant of arrest nga gi-isyu sa Galveston County Sheriff’s Office sa Texas, USA.
Gawas pa ana, duna siyay immigration violations tungod sa pag-overstay sa Pilipinas.
Ang suspek nadakpan sa grupo ni Police Lieutenant Colonel Henrix P. Bancoleta atol sa operasyon niadtong Abril 28, 2026.
Wanted
Nadakpan sa mga operatiba sa Labangon Police Station 10 ang usa ka gikonsiderar nga Top 4 Most Wanted Person regional level sa Barangay Kalunasan, Dakbayan sa Sugbo niadtong Hunyo 3, 2026.
Ang operasyon gihimo pinaagi sa E-Warrant sa kasong murder nga gilusad sa Tracker Team sa Police Station 10, nga gipangulohan ni Police Captain Joel G. Dela Cerna.
Giila ang dinakpan nga si alyas “Rosendo,” 32, taga Sitio Upper, Barangay Kalunasan, Dakbayan sa Sugbo.
Ang maong warrant of arrest giisyu sa Presiding Judge sa Regional Trial Court, 7th Judicial Region, Branch 15, Dakbayan sa Sugbo, niadtong Hunyo 2, 2026, ug walay piyansa nga girekomenda.
Armado
Sa laing bahin, nadakpan sa kapolisan ang usa ka 21-anyos nga lalaki human nasakmitan og illegal nga armas diha sa Barangay Bolinawan, Carcar City niadtong Hunyo 3, 2026.
Sumala pa sa Carcar City Police Station dunay nanawag sa ila bahin sa armadong tawo diha sa Sitio Relis Cambuntan, Barangay Bolinawan.
Pag-abot sa mga polis, ilang gidakop ang suspek ug nakuhaan kini og caliber .22 revolver nga may sulod nga tulo ka bala. Wala siyay napakitang legal nga dokumento sa paghupot niini. — Cheny R. Labrador (BANAT NEWS)
- Latest
