Curfew Ordinance sa Mandaue City amendahan
CEBU, Philippines — Tungod sa pagbalik-balik og buhat og kalapasan sa mga menor de edad sa kasamtang curfew ordinance sa Mandaue City, nasabutan nga mas hatagan pa gyud og ngipon ang maong ordinansa.
Atol sa panagtigum kagahapon, Hunyo 4 sa Local Council for the Protection of Children (LCPC) nasabutan nga amendahan ang curfew ordinance aron himuong mas bug-at ang silot sa mga malapason.
Sa pagkakaron, nakita nila nga dili epektibong pang rehabilitasyon ang kasamtangang silot nga usa ka adlaw nga community service.
Sa pakighinabi kang Councilor Jennifer Del Mar, tsirman sa committee on women and family, iyang gisugyot ang pagpahigayon og public hearing aron madungog ang sentimyento sa mga residente kung uyon ba sila nga amendahan ang curfew ordinance alang sa mga menor de edad.
Gusto nilang parehason sa Lapu-Lapu City nga pamultahon gikan P3,000 hangtod P5,000 sa ika-upat kalapasan, ug dugang P500 sa matag mosunod nga paglapas ang silot.
Samtang pasado na kini sa LCPC, gusto gihapon nilang moagi ni og public hearing sa dili pa matapos ning bulan sa Hunyo.
Ang mga miyembro sa LCPC naglangkob sa nagkalain-laing opisina sama sa Mayor’s Office, City Social Welfare Services (CSWS), Non-Governmental Organizations (NGOs), Philippine National Police (PNP), ug Disaster Office.
Samtang sa vandalism ordinance, ang mga hamtong ray naay silot apan walay silot sa mga batang maghugaw-hugaw. Gisusi nila kung hasta kini apilon sa amendahan. —Mia D. Esplaguera (BANAT NEWS)
- Latest
