Solar Spikers, Chargers unahang bumangon
MANILA, Philippines — Inaasahang babawi ang Capital1 Solar Energy at Akari Chargers sa kanilang unang kabiguan sa 2026 Premier Volleyball League (PVL) All-Filipino Conference Siklab leg.
Magtutuos ang Solar Spikers at Chargers ngayong ala-1 ng hapon, habang maghaharap ang Choco Mucho Flying Titans at ZUS Coffee Thunderbelles sa alas-6 ng gabi sa Ynares Center sa Antipolo City.
Nadiskaril ang pagparada ng Capital1 sa kanilang ‘Big Three’ na sina Bella Belen, Vanie Gandler at Erika Santos matapos ang 25-22, 25-18, 17-25, 20-25, 8-15 pagyukod sa Choco Mucho sa pagbubukas ng Siklab leg noong nakaraang Sabado.
Sa nasabing pagkatalo ng Solar Spikers ay umiskor si Santos ng 22 points, habang nagposte si Belen ng triple-double na 15 markers, 15 receptions at 10 digs at nagtala si Gandler ng 15 points at 14 receptions.
“Kumbaga, since bago ‘yung team, I mean, hindi pa kami ganun katagal nagti-training,” ani Belen. “Pero siyempre, hindi naman namin puwedeng gawing excuse ‘yun kung bakit kami natalo.”
Makakatuwang din nina Belen, Gandler at Santos sina setter Juju Coronel at rookie libero Detdet Pepito.
Kagaya ng Capital1, hangad rin ng Akari na makabawi sa kanilang 18-25, 21-25, 18-25 pagkakawalis ng Creamline.
Itatapat ng Chargers sina Ivy Lacsina, Grethcel Soltones, Eli Soyud at Alas Pilipinas members Mars Alba at Justine Jazareno.
Samantala, puntirya ng Choco Mucho ang ikalawang sunod na panalo sa pagsagupa sa ZUS Coffee na sasalang sa unang pagkakataon.
- Latest
