Kasado na karong Disiembre 1 mas dako, mas nindot nga "run with the masters"

CEBU, Philippines — Ang mga nagorganisa sa "Run with the Masters 2024" sa Cebu Landmasters, Inc. (CLI) nanghinaut nga buk-on ang gidaghanon sa mga partisipante sa ilang karera sa miaging tuig sa gikahinaman nilang ikaduha nga edisyon karong Disiembre 1 didto sa Cebu Business Park.

Atol sa usa ka press conference didto sa Lyf Hotel sa Baseline Center niadtong Biyernes, Nobiembre 15, si CLI Chief Operating Officer Franco Soberano nagkanayon nga buot nilang himoon ang tinuig nilang kalihukan sa paugnat sa kusog nga labing dako sa Sugbo ug usa sa labing nindot sa nasud sa umaabot.

“The dream is for this Run with the Masters to be one of the biggest if not, one of the best runs in the Philippines,” matud pa ni Soberano, nga usa mismo ka establisadong marathoner.

Si Soberano naglantaw ngadto sa paghatag og katumanan sa ilang damgo sud sa duha o tulo ka tuig.

“I’m a competitive guy, who knows CLI can have the highest attendance. It’s really well-supported by sponsors, contractors, suppliers, partners. Give us two to three years, we want to be the biggest run here in Cebu,” dugang pa ni Soberano.

Si Soberano nagkanayon nga nakigtambayayong sila ni Joel Juarez sa Coco Running aron makuha ang ilang gitinguha.

Sa laing bahin, miabot na ngadto sa 2,000 ka runners ang nakaparehistro sa nagkadaiyang age groups alang sa "Run with the Masters 2".

Giinat hinoon ang deadline sa rehistrasyon ngadto sa November 20 aron pagkab-ot sa ilang target nga 3,500 ngadto sa 4,000 runners ning higayona ug malabwan ang 3,000 ka mga entrante sa buena mano nilang edisyon niadtong 2023.

Ang dagan alang sa mahinungdanong kawsa naglangkob og lima ka distansiya:1K, 3K, 6K, 12K, ug 21K. Imbes nga usa ka open division, ang 21K adunay lain-lain nga mga age groups aron paghatag sa tanan og patas nga tsansa aron makadaog.

Ang tanang finishers makadawat og souvenir shirt, raffle entry, post-race snacks, ug race expo ticket.