Nuggets laglag sa Timberwolves sa 0-2

DENVER — Humataw sina Anthony Edwards at Karl-Anthony Towns ng tig-27 points sa 106-80 demolisyon ng Minnesota Timberwolves sa nagdedepensang Nuggets para iposte ang 2-0 lead sa kanilang Western Confe­rence semifinals duel.

Muling tinalo ng Timberwolves ang defending champions sa ikalawang sunod na pagkakataon sa serye bagama’t hindi naglaro si starting center Rudy Gobert na sinaksihan ang pagsilang ng kanyang anak sa Minneapolis.

May 20 points si Aaron Gordon para sa Denver habang humakot si Nikola Jokic ng 16 points at 16 rebounds at nalimitahan sa walong puntos si Jamal Murray mula sa masamang 3-of-18 field goal shooting.

Nabaon ang Nuggets sa halftime, 35-61, na pinakamalaki nilang halftime deficit sa isang home playoff game sa franchise history bago tuluyang iwanan ng Timberwolves sa 82-60 papasok sa fourth quarter.

Sa New York, kumamada si Jalen Brunson ng 43 points para banderahan ang Knicks sa 121-117 panalo sa Indiana Pacers sa Game One ng kanilang Eastern Conference semifinals series.

Si Brunson ang na­ging ikaapat na player sa NBA history na naglista ng 40-point games sa postseason kasama sina Hall of Famers Jerry West, Michael Jordan at Bernard King.

Nag-ambag si Donte DiVincenzo ng 25 markers kasama ang tiebreaking three-point shot para sa New York sa huling 40 segundo ng fourth quarter.

Kumolekta si Josh Hart ng playoff career-high 24 points bukod sa 13 rebounds at 8 assists.

Binanderahan ni center Myles Turner ang Indiana sa kanyang 23 points kasunod ang 19 markers ni Pascal Siakam.