Ayaw kahadlok!

Mao diay nga kalit ra nahanaw si Cebu City administrator Albert Tan sa Cebu City Hall kay nakahukom diay siya nga mopahuway lang usa sa katungdanan kay duna diay mireklamo kabahin sa pamaagi sa Bids and Awards Committee.

Wa kaayo ko masuhito kon unsay papel ni Tan sa BAC, kon apil ba siya o kaha usa siya sa mopirma. Apan dugay na ko nga nakadungog sa bagolbol sa uban, ug gani duna ko’y nabasahan nga uploaded content sa social media nga ang gisaway mao ang city administrator.

Dili mi kaila ni Tan. Wa siya makaila nako kay dihang tig-adtoan pa ko sa City Hall kaniadto, nagsugat ra man mi nga dili magtagdanay. Wa ra sab ko motagad kay nagpaniid pa ko sa iyang batasan, apan kalma ra siya nga pagkatawo ug mora’g dili hambugero.

Makauuwaw gyud hinuon kadtong gipublikar sa social media nga klaro kaayong gihimo sa mga tawo nga dunay kalagot kaniya. Duna pay hulagway sa usa ka babaye nga nagpakita nga iya kining gigakus ug diha sila sa dagat. Wa ra ko magtagad kay klaro man nga gihimo sa artificial intelligence.

Apan maayo ang gihimo ni Tan, kon tinuod man nga siya ang mibulontaryo nga mopahawa usa sa katungdanan aron nga way makabalda sa imbestigasyon. Sayod ko nga sakit sa buot ni Mayor Nestor Archival nga mapulihan ang iyang pinangga nga city administrator.

Gipuli ni Archival si Atty. Briccio Boholst nga maoy gipuli niya nga acting city administrator, gawas sa iyang pagka city legal officer.

Matud sa report nga dunay mga supplier nga mireklamo sa mga pamaagi sa Bids and Awards Committee. Ambot ngano kaha. Karon nga gipa-leave na si Tan, maayong dili kamo magtinalawan.

Kon tan-aw ninyo dunay binuang nga gihimo diha sa BAC, ibulgar ninyo ug itug-an sa mayor. Kon dili kini aksyonan sa mayor, itug-an sa mga sakop sa media aron mabulgar kini sa publiko.

Ang trabaho sa BAC mao ang paghashas sa mga dukomento sa suppliers ug mga produkto diha sa kagamhanan sa dakbayan. Tinuod, kon abtik ang mga sakop sa BAC, aw maoy giingon “Paldo” sila.

* * *

Ang trabaho sa city administrator mao ang pag-abag sa mayor aron mapagaan niini ang iyang mga trabaho. Mao man gani nga ang city administrator gitawag sab og “little mayor.”

Duna siya’y katungod sa pagpatawag sa mga department heads ug iyang mandoan sa mga gimbuhaton kon makita niya nga wa kini magtuman sa ilang katungdanan.

Kada semana, ang city administrator makigtagbo gyud sa mga department heads, sagad Lunes sa buntag human sa flag-raising. Niini nga miting ang mayor mahimong motambong.

Paabuton nato ang resulta sa imbestigasyon.