EDITORYAL - Duhay maigo sa usa ka bato

Wala motubag ang embahada sa China bahin sa pasangil nga sila maoy maka-benepisyo anang giingong usa ka suwat nga gipakatap sa social media nga giingong gikan o pirmado ni Secretary of National Defense Gilbert Teodoro Jr.

Ang suwat matud pa gi-address ngadto sa usa ka Peter Enzminger nga  usa ka Central Intelligence Agency officer sa Amerika.

Sumala pa sa mga report naghisgot kabahin sa mga law enforcement operations diha sa West Philippine Sea ug ingon man mga nahitabo sa politika dinhi sa nasud, kooperasyon sa US ug Pilipinas.

Gihimakak na kining daan ni Teodoro, gihulagway sab kini sa Armed Forces of the Philippines nga usa ka “fake” nga gihimo aron gub-on ang kredibilidad ni Teodoro. 

Nag-imbestigar na niini ang National Bureau of Investigation.

Nagduda ang AFP nga ang Chinese Communist Party maoy nagpaluyo niini ug naay mga Pilipinong kakunsabo.

Daan ng nasayud ang publiko nga naay mga Pilipinong nagtraydor sa Pilipinas tungod kay mas nisuporta sila sa China tungod sa ilang personal ug business interest.  Gawas pa ana, naa silay personal nga galagot sa administrasyon ug sa presidente.

Nagduda ang DND nga pamaagi ni aron dauton ug gub-on ang mga paningkamot sa gobiyerno nga protektahan ang mga teritoryo sa West Philippine Sea. Kinsa may mabulahan aning pekeng suwat , dili ba ang China? 

Apan naay laing anggulo o motibo, di ba kaha ni parte sa politika para sa umaabot nga 2028 presidential elections.

Kay pwede ning balik-balikon og patik sa social media  inig panahon na sa tingkampanya o nagpadulong na ang filing sa mga sertipiko de kandidatora.

 Bisan tuod og wala moanunsyo si Teodoro nga mokandidato, nabantayan nga sibaw kaayo iyang pangalan ilabi na sa social media diri sa nasud ug sa international scene.

Tungod sa iyang mga way kahadlok, pintok ug undanong mga pamahayag kabahin sa WPS ug batok sa mga pagpanghasi sa China.

Atong hinumdoman nga sa nangaging duha ka nasudnong mga eleksyon dunay mga balitang naay mga politikong gipaluyohan sa China.

Ug unsa may pamaagi para masigurado ilang kadaugan?  Gub-on ang kredibilidad sa kaatbang pinaagi sa social media.  Kay kun ilaha na ang mga galingkod, sayun nalang para nila paghari-hari sa WPS. Duhay maigo sa usa ka bato.