5th San Remigio Properties Invitational Cup mosikad na

CEBU, Philippines — Walo ka mga teams ang magbugno alang sa korona sa 5th San Remigio Properties Basketball Tournament Invitational Cup nga mosikad na karong adlawa (Huybes, Agosto 1) didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Upat sa mga entrante ang nagagikan sa Cebu Schools Athletic Foundation, Inc. (CESAFI) nga gipangulohan sa two-time defending champion SHS-AdC Magis Eagles ni coach Rommel Rasmo nga mipadala og duha ka koponan nga mao ang Magis ug Lux Oriens.   

Ang uban mao ang University of the Visayas (UV) Baby Lancers ni coach Jun Pepito, University of Cebu (UC) Junior Webmasters ni coach Joever "Brad" Samonte, ug University of Southern Philippines Foundation (USPF) Baby Panthers ni coach Alan Cabatingan.

Mapasalamaton silang tanan ni Mark Anthony Ynoc sa pag-organisa ning maong torneyo nga naghatag kanila og oporturnidad nga masukod ang ilang kaandam sa umabot nga CESAFI Season  24 nga gitakdang sugdan sa Septiembre 21 sa Cebu Coliseum.

Ang mga pambato sa CESAFI makigbugno sa duha ka bisitang puwersa gikan sa Taiwan, ang National Yi-Lan Seniors High School.

"Last year, we had the chance to engage with many Cebu teams, and we found them to be both smart and strong. This tournament is a great opportunity for us to learn and become even more competitive," matud pa ni Yi Lan head coach Lin Te-Chi.

Mokumbati sab alang sa titulo ang St. John's Institute (SJI)-Hua Ming sa Bacolod City.

“Facing off against the top teams from Cebu and Taiwan will be an incredible learning experience for our players,”  dason pa ni  SJI-Bacolod coach Ronnie Panaguiton.

Sa pasiunang mga duwa sa alas 5:30 sa hapon, ang Lux Oriens mosakbang sa Baby Panthers, samtang ang Yi-Lan 1 makigsangka sa Baby Lancers.

Sa alas-7 sa gabii, ang Magis makigpinaksitay sa SJI-Bacolod, samtang ang Yi-Lan 2 makigbangga sa Baby Webmasters. (BANAT NEWS)