Gawing mandatory ang basic education sa digital literacy, isusulong ng Kamara

MANILA, Philippines — Isinusulong ni House Speaker Faustino “Bojie­” G. Dy III na gawing mandatoryong bahagi ang basic education sa digital lite­racy sa pagprotekta sa mga batang Pilipino online.

Pinamumunuan ni Pasig City Rep. Roman T. Romulo ang “technical working group” sa patuloy na pagtalakay sa mga komento at iminungkahing rebisyon sa iba’t ibang hakbang sa kaligtasan at proteksyon ng mga bata online sa digital na kapaligiran na naglala­yong pagtugmain ang magkakaibang pamamaraan sa pag-regulate ng access ng mga menor de edad sa social media.

Bagama’t ang ilang mga panukalang batas ay naglalayong ipagbawal ang pag-access sa social media para sa mga batang wala pang 13 taong gulang, ang iba ay nagmumungkahi ng mga paghihigpit na sumasaklaw sa mga menor de edad na wala pang 18 taong gulang.

Kabilang sa mga hakbang na inihain sa TWG ay ang House Bill No. 9965, na isinulat ni Dy kasama si Majority Leader Ferdinand Alexander “Sandro” Marcos, na gumagamit ng unti-unting pamamaraan sa pamamagitan ng pagbabawal sa mga social media account para sa mga batang wala pang 13 taong gulang­ habang pinapayagan lamang ang mga may edad 13 hanggang 18 taong gulang na maka-access sa mga platform na may pahintulot ng magulang.

Sa ilalim ng HB 9965, isasama ng Depart­ment of Information and Communications Technology­ (DICT), sa pakiki­pagtu­lu­ngan ng Department of Education (DepEd), ang modyul na “Digital Lite­racy and Ethical Use of Social Media” sa kurikulum ng K to 12.

Sinabi ni Dy na kiniki­lala ng hakbang na ang pinakamabisang protek­syon­ para sa mga bata ay ang pagbibigay sa kanila ng kaalaman at kasanayan upang responsableng ma­lampasan ang digital na mundo.