LTO-7 niluwat og SCO batok sa SUV driver

CEBU, Philippines — Nagpagawas og show cause order ang Land Transportation Office sa Central Visayas (LTO-7) batok sa drayber sa usa ka Isuzu MU-X nga nalambigit sa hit-and-run nga insidente nga nakaangol og traffic enforcer diha sa eskina Escario ug Osmeña Blvd.

Naangol sa maong hitabo ang enforcer nga si Jovanie Verano, 44, sakop sa Cebu City Transportation Office (CCTO) nga nadestino sa maong dapit. Sa pahayag niadtong Huwebes, miingon si LTO-7 Regional Director Atty. Wendel C. Dinglasan gimandoan sa show cause order ang drayber nga personal nga motambong sa hearing sa LTO-7 Operations Division sa Hulyo 6, 2026, para tubagon nganong dili siya dapat silotan administratibo.

Ang drayber sa SUV giila nga si Bartolome Robles Piol, usa ka retiradong engineer sa Dakbayan sa Toledo. Si Piol daan ng namahayag nga nisanong gyud siya sa mando sa traffic enforcer apan na-rattle siya sa dihang kalit nga miabante iyang sakyanan kay aksidente niyang nabuhian ang brake.

Gibutang sab sa preventive suspension ang lisensya sa drayber sulod sa 90 ka adlaw nga gimando nga ipa-surrender ang lisensya atol sa hearing. (BANAT NEWS)