German patay sa Sunog

CEBU, Philippines — Usa ka German national ang nakabsan og kinabuhi human sa sunog sa  usa ka pension house sa F.B. Cabahug, Brgy. Guizo, dakbayan sa Mandaue  kagahapon Biyernes sa buntag, Mayo 29, 2026. Giila ang  namatay nga si Thomas Hans Schiemmer, 56-anyos, tenant sa maong pension house nga Maanyag Pension House. Base sa report sa Mandaue City Fire Station, unang nabatyagan ang sunog sa security guard sa pension house diin dayon gi-alarma ang tanang tenants apil na niini ang German national.  

Ang  usa sa mga tenant ang nitawag sa kabomberohan alas 4:01 sa kadlawon. Daling nakaresponde ang mga bomber ug gibutang dayun kini sa first alarm ang sunog sa alas 4:04 sa kadlawon.

Gideklarar sa Mandaue City Bureau of Fire Protection (BFP) nga under control na ang kalayo pag 4:52 sa kadlawon ug hingpit napalong  alas 5:24 sa buntag.

Apan atol sa pagsubay sa mga bombero sa sulod napalgan ang German national ubos sa hagdanan nga adugay paso sa nawong ug sa lawas ug wala nay kinabuhi.

Giingong natanggong ang biktima sulod sa maong lugar samtang nagkakusog ang kalayo ug na-suffocate tungod sa kabaga sa aso samtang naningkamot siya makagawas nga maoy hinungdan sa iyang pagkamatayon.

Sa wala pa ni nahitabo, gikatahong nakagawas na unta si Schiemmer apan nibalik siya sa sulod bisan giunsa pa siya pagbabag sa caretaker ug sa gwardiya.

Naa daw ni siyay kuhaon sa stockroom ug ang iyang personal nga gamit.

Base sa imbestigasyon sa Mandaue City Police Station (MCPO), ang hinungdan sa maong sunog kay electrical failure sa bombilya sulod sa stock room sa pension house.

Suma pa sa report, adunay mga hygiene products sama sa towels ug tissues maong stockroom maong dali nikatag ang kalayo sa establisamento.

Matud ni FO1 Rolando Ajero, Fire Arson investigator sa Mandaue City Fire Station, gi bana bana niabot sa P6,696,000 nga damage sa sunog. Samtang si Police Lt. Colonel Mercy Villaro, tigpamaba sa Mandaue City Police Office, miingon nga nakig koordinar na sila sa German Embassy aron makontak ang pamilya sa biktima samtang padayon pa ang imbestigasyon— Mia D. Esplaguera,CNU-Intern/IBM  BANAT NEWS