Cavite, nanguna sa rami ng nakumpiskang droga
Sa buong Calabarzon
CAVITE, Philippines — Nanguna ang Cavite Police sa buong Calabarzon region sa rami ng mga nakumpiskang droga sa loob lamang ng isang linggong anti-drug operation.
Sa ulat ng pulisya, umabot sa 703.77 gramo ng ilegal na droga ang nasamsam sa Cavite sa sunud-sunod na operasyon nito.
Ayon sa Police Regional Office 4A, 225 drug operations ang naisagawa sa loob lamang ng isang linggo sa buong Calabarzon at may 274 indibidwal ang naaresto.
Sa pamumuno ni PB Gen. Dominic L. Baccay, nasamsam sa mga isinagawang operasyon ang may 993.5 gramong shabu, 29.51 gramo ng marijuana at 10 kilo ng marijuana Kush.
Sa kabuuan, aabot ang nakumpiskang droga sa P6,774,764.
Pumangalawa ang Laguna PPO sa rami ng mga nakumpiskang droga na umabot sa 157.01 gramo, sinundan ng Rizal PPO, 51.49 gramo; Batangas PPO, 41.54 gramo, at Quezon PPO, 39.69 gramo.
Isinagawa ang operasyon simula Oktubre 19 hanggang Oktubre 25, 2026.
- Latest
