Mag-utol na senior, kinatay ng pamangkin
MANILA, Philippines — Pinagsasaksak at pinagtataga ng isang 32-anyos na lalaki ang kanyang tiyahin at tiyuhin na mag-utol at kapwa senior citizen dahil sa galit nang siya ay pinagbintangan na magnanakaw naganap sa loob ng bahay ng magkapatid sa Brgy. Paruddun Norte, Aparri, Cagayan noong Lunes.
Ang magkapatid na biktima ay isang 85-anyos na babae at kapatid nitong 75-anyos na lalaki.
Batay sa ulat ni P/Major Vilmore Malillin, hepe ng Aparri Municipal Police Station (MPS), naitala ang krimen sa tahanan ng magkapatid na biktima, alas-4:00 ng hapon.
Lumalabas na pinasok ng suspek na armado ng itak ang bahay ng magkapatid at walang sabi-sabi na sinaksak una ang matandang babae na duguang humandusay.
Pagkatapos ay pinasok nito ang silid ng matandang lalaki na pinagtataga naman nito.
Nasaksihan ng isang menor-de-edad ang krimen na agad tumakbo at humingi ng tulong sa barangay.
Tumawag naman ang barangay ng pulisya na sa pagresponde sa crime scene ay kusang sumuko ang suspek.
Inamin ng suspect ang krimen na nasa impluwensya siya ng alak at sinabing nagawa lamang niyang paslangin ang mga biktima dahilan sa matinding sama ng loob dahilan pinagbibintangan umano siyang magnanakaw. Ang suspek ay kinasuhan ng double murder.
- Latest
