Nagkadugay, nagkadaghan ang mga nanggawas nga mga akusasyon batok kang Bise Presidente Sara Duterte gawas sa una ng mga gipasangil sa iyaha nga maoy nakaingon nga nag-atubang siya karon og impeachment ug kaso sa korte.
Ang pinakabag-o, kaning akusasyon sa iyang kanhi security aide ni kanhi speaker Lord Allan Velasco nga si Police Corporal Rodulfo Gracioso Jr. nga nipasangil nga gihatdan niya og P2 bilyones ka pesos si Vice President Sara Duterte nga gisulod og mga maleta.
Gawas kang VP Sara, apil sa matud pa gihatdan ni Gracioso og kwarta ubos sa mando ni Velasco silang kanhi president Rodrigo Duterte ug Davao City 1st District Rep. Paolo Duterte.
Si Gracioso maoy head security ni Velasco nga kaalyado ni Duterte sugod niadtong 2018 hangtud sa panahon nga ang kongresista nahimong House Speaker gikan 2020 hangtud 2022.
Basi sa iyang affidavit nga gikuptan sa National Bureau of Investigation gibanabana niyang sobra P2 bilyones ang iyang nahatud kang VP Sara sulod sa kapin 20 ka higayon. Matud pa niya, gikan sa P20 milyones hangtud P50 milyones ang iyang nahatud sa nagkalain-laing mga lokasyon sa Metro Manila, Davao ug uban pang mga lugar.
Padayun ang NBI sa ilang imbestigasyon bahin aning bag-ong pasangil batok sa bise presidente.
Pero namahayag ang kampo sa Bise Presidente ngakaning bag-ong gipasangil kaniya parehas ra ni sa gibuhat sab niadtong laing nangangkong kanhi niya security aide nga si Ramil Madriaga.
Nipasangil sad ang bise presidente nga lain napud n inga desperadong lakang sa administrasyon aron dili siya makadagan pagka-presidente sa 2028.
Kaning mga pasangil, matinuod man o dili—kung gipasangil batok sa usa ka dakong opisyal sa gobiyerno ug naglambigit sa kwarta sa katawhan—dili mahimong tubagon lang sa usa ka kontra-pamahayag.
Sa habig sab sa mga nag-imbestigar, bisan pa man sa nagduda sa motibo, kinahanglang pamatud-an nila ni pinaagi sa mga ebidensiya nga makakombinsir sa publiko.
Kay kung dili kini mapatud-ang tinuod, mahulog nga pulos lang kini akusasyon sa kampo sa bise presidente nga gigukod lang tungod sa politika ug makakita niini ang publiko.
Basi sa iyang affidavit nga gikuptan sa National Bureau of Investigation gibanabana niyang sobra P2 bilyones ang iyang nahatud kang VP Sara sulod sa kapin 20 ka higayon. Matud pa niya, gikan sa P20 milyones hangtud P50 milyones ang iyang nahatud sa nagkalain-laing mga lokasyon sa Metro Manila, Davao ug uban pang mga lugar.