Naunay sa kahawod
Kon wala pang kabantay si Bise Presidente Sara Duterte, nga posibleng maoy rason nganong padayon nga nangangkon nga walay ebidensiya ang prosekusyon sa impeachment trial batok niya, daghan na napresentar nga mga dokumento ug mga testimoniya nga momatuod sa upat ka articles of impeachment.
Lisod hinuong dawaton ni VP Sara nga, sama sa iyang amahan nga si kanhi Presidente Rodrigo Duterte kinsa bag-o lang gihukman nga padayong mapriso sa The Hague, siya ra sab ang tinubdan sa labing lig-on nga mga ebidensiya nga gigamit karon sa prosecutors sa pagkonbikto niya.
* * *
Labing lig-on nga ebidensiya sa betrayal of public trust sa iyang hulga pagpapatay nilang Presidente Ferdinand Marcos Jr., First Lady Liza Marcos ug kanhi House Speaker Martin Romualdez mao ang iyang online press conference, nga puno sa masuk-anong mga balikas, sa kadlawon niadtong Nobyembre 24, 2024.
Kinakusgang mga dokumento sa pataka nga gasto sa iyang confidential funds mao ang acknowledgment receipts nga hinimo sa iyang mga trabahante sa Office of the Vice President ug Department of Education nga nagbugalbugal sa pekeng mga ngalan nilang Mary Grace Piattos ug kaubanan.
* * *
Labing uwahing gipakita sa prosekusyon: Iyang statements of assets, liabilities and net worth nga nagmatuod sa paglapas sa 1987 Constitution nga nagdili niya pag-negosyo. Siyay nilista sa mga kompaniya nga iyang gipanag-iya ug gidumala bisan bise presidente na sugod sa Hunyo 30, 2022.
Samot siya og kaapiki kay usa sa iyang giangkong kompaniya nisulod og catering contract uban sa Davao City Hall nga gipangulohan sa iyang manghod nga si Mayor Baste Duterte.
* * *
Nakalapas nang daan si VP Sara sa konstitusyon, giyatakan pa gyod ang Government Procurement Act ug ubang mga balaod nga nagdili ni Baste sa pagsulod og mga transaksiyon uban sa iyang mga paryente, labi na sa iyang maguwang. Kon makonbikto si VP Sara sa impeachment trial ug si Baste sa buwag nga mga kasong ipasaka batok niya, managsama silang mapalagpot sa puwesto.
Ambot ang mga Duterte, gikan sa amahan ngadto sa mga anak. Wala ba lang mahibawo, o wala ba lay nakapahinumdom nila sa mga balaod? O nagtuo nga, tungod sa naghinobrang kahawod ug kahubog sa gahom, labaw pa sila sa balaod?
* * *
- Latest
